అంతా నీ ఇష్టం

చీకట్లో

మగ్గుతావో,

వెలుగుల్లో

మెరుస్తావో — నీ ఇష్టం.

ఓటమితో

కృంగిపోతావో,

గెలుపుకోసం

కృషిచేస్తావో — నీ ఇష్టం.

అజ్ఞానంలో

కునారిల్లుతావో,

విజ్ఞానంతో

వర్ధిల్లుతావో — నీ ఇష్టం.

పాపాలు

మూటకట్టుకుంటావో,

పుణ్యాలు

ప్రాప్తించుకుంటావో — నీ ఇష్టం.

పరువు

పోగొట్టుకుంటావో,

పేరు

తెచ్చుకుంటావో — నీ ఇష్టం.

గుడ్డిగా

అనుసరిస్తావో,

పారజూచి

ప్రవర్తిస్తావో — నీ ఇష్టం.

మనుజులను

బాధపెడతావో,

మనసులను

దోచుకుంటావో — నీ ఇష్టం.

పిచ్చిగా

జీవితం గడుపుతావో,

తెలివితో

మనుగడ సాగిస్తావో — నీ ఇష్టం.

అబద్ధాలు

చెబుతావో,

నిజాలు

వెల్లడిస్తావో — నీ ఇష్టం.

చేదును

పంచుతావో,

తీపిని

తినిపిస్తావో — నీ ఇష్టం.

ద్వేషము

రగిలిస్తావో,

ప్రేమను

పంచుతావో — నీ ఇష్టం.

చిగురించి

పచ్చబడతావో,

పండిపోయి

రాలిపోతావో — నీ ఇష్టం.

లేనివాటికి

వెంపర్లాడుతావో,

ఉన్నవాటితో

ఆనందిస్తావో — నీ ఇష్టం.

ఉత్తమాటలు

చెబుతావో,

గట్టి మార్గము

ఎన్నుకుంటావో — నీ ఇష్టం.

ముళ్ళబాటలో

నడుస్తావో -

పూలపథంలో

పయనిస్తావో - నీ ఇష్టం.

సొంతలాభము

కోరుకుంటావో -

సమాజశ్రేయస్సు

ఆశిస్తావో - నీ ఇష్టం.

నీ మనసే నీ అదృష్టం,

నీ చేతలే నీ ఐశ్వర్యం - 

అంతా నీ ఇష్టం...

కానీ- నీ ఇష్టమే నీ భవిష్యత్తు -గుర్తించుకో.

నీ భవితవ్యం

నీ చేతుల్లోనే నిక్షిప్తం

నీ జీవితం

నీ నిర్ణయాల ప్రతిబింబం - గుర్తించుకో.

గుండ్లపల్లి రాజేంద్రప్రసాద్, భాగ్యనగరం