చెట్ల గాధలు 

చెట్లు — నాటినదీ చూశా,

పెంచినదీ చూశా,

కొట్టినదీ చూశా,

కాల్చినదీ చూశా.

చెట్లు — పూసి పరిమళించినవీ చూశా,

పొంకాలు చూపి మురిపించినవీ చూశా,

సౌరభాలు చల్లి సంతసపెట్టినవీ చూశా,

ప్రకృతిని పరవశింపజేసినవీ చూశా.

చెట్లు — కాయలతో తీపి పంచినవీ చూశా,

జీవితాలను పోషించినవీ చూశా,

తనువులను తృప్తిపరిచినవీ చూశా,

భూమికి బలం అందించినవీ చూశా.

చెట్లు — పలకరించి నీడనిచ్చినవీ చూశా,

చెంతకు పిలిచి చల్లదనమిచ్చినవీ చూశా,

చెలిమిగా నిలిచినవీ చూశా,

మానవునికి మిత్రులైనవీ చూశా.

చెట్లు — గాలిని ఆలింగనంచేసినవీ చూశా,

పక్షులకు గూళ్ళైనవీ చూశా,

పశువులకు మేతైనవీ చూశా,

జీవులకు ఆధారమైనవీ చూశా.

చెట్లు — మందులైనవీ చూశా,

రోగాలను తగ్గించినవీ చూశా,

దేవతలగా అయ్యినవీ చూశా,

పూజలను  స్వీకరించినవీ చూశా.

చెట్లు — రాళ్లదెబ్బల తిన్నవీ చూశా,

గొడ్డళ్లతో నరికినవీ చూశా,

అరచి ఏడ్చినవీ చూశా,

కూలి నేలకొరిగినవీ చూశా.

చెట్లు — చిగురించీ పునర్జీవించినవీ చూశా,

పచ్చదనమై పులకరించినవీ చూశా,

వరదల్లో కాపాడినవీ చూశా,

వేడిగాలిలో ఆశ్రయమిచ్చినవీ చూశా.

చెట్లు — సావాసం నేర్పినవీ చూశా,

సేవల చేయమన్నవీ చూశా,

సమాజాన్ని వృద్ధిచేయమనినవీ చూశా,

సత్యంగా జీవించమనినవీ చూశా.

చెట్లు — కవులను కలంపట్టించినవీ చూశా,

ఆలోచనలను రేకెత్తించినవీ చూశా,

కవితలుగా మార్పించినవీ చూశా,

మనసుల్ని మెలిపెట్టినవీ చూశా.

చెట్లు — మౌనంగా మాట్లాడినవీ చూశా,

జీవనమూలం అయ్యినవీ చూశా,

మనసులని మృదువుచేసినవీ చూశా —

మానవుని మనిషినిచేసినవీ చూశా!

చెట్లు - త్యాగాలు చేసినవీ చూశా,

నరుల స్వార్ధాలను త్రుంచినవీ చూశా,

ప్రకృతిని పరిశుద్ధం చేసినవీ  చూశా

పుడమికి ప్రసన్నత చేకూర్చినవీ చూశా

గుండ్లపల్లి రాజేంద్రప్రసాద్, భాగ్యనగరం