షడ్రుచుల సాహిత్యసింగారం

తేనెబొట్టు లాంటి పదార్థం,

మధుర పదాల మాధుర్యం,

మనసును మురిపించే మృదుత్వం

కవితకు తొలి ఆభరణం — తియ్యదనం.

చినుకులాంటి జ్ఞానం,

సత్యస్పర్శల సరళం,

జీవితపు నిజరూప దర్శనం

పదాల నిజత్వం — లవణం.

ధైర్యపు తళుకులాంటి

తీక్ష్ణ భావాల ప్రకాశం,

అన్యాయంపై అగ్నిపథం

కలం చేసే గర్జనం — కారం.

విరహపు రుచిలాంటి

వేదన తడిసిన భావం,

ప్రేమ విఫలమైన వేళలో

జాలిగా జారే అక్షరాలసమూహం — ఆమ్లం.

దుర్భర కష్టనష్టాల

అనుభవాల సమ్మిళితం,

పరిణతి పథం చూపిస్తూ

మనిషిని మార్చే కవనాలస్వాదం — తిక్తం.

త్యాగపు రుచిలాంటి

త్యజనగాథల తాత్పర్యం,

ఆత్మనిగ్రహ దీపంగా

వెలిగే భావ విస్తారం — కషాయం.

ఆరురుచుల కలయికే

అద్భుత కవితలకు ప్రాణాధారం,

షడ్రుచుల సమ్మేళనమే

సాహిత్య సామ్రాజ్యానికి సింగారం. 

అచ్చరాల ప్రియులకు 

అన్నిరుచులు అందించటానికే నా అక్షరాల అల్లకం -

పదపంక్తుల పాఠకులకు 

పసందులు పంచుటకొరకే నా పదముల పరిపాకం.

✍️ గుండ్లపల్లి రాజేంద్రప్రసాద్, భాగ్యనగరం ✍️