అతడు ఆమె

అతడు ఉద్యోగి

ఆదాయం కలవాడు

ఆమె వెచ్చించేది

అందినడబ్బును ఆవిరిచేసేది

ఆలశ్యంచేయక సర్దిచెప్పండి

ఆ ఇద్దరికి పెళ్ళిచెయ్యండి

అతను ఆరడుగుల అందగాడు

ఆకర్షించే రూపంకలవాడు

ఆమె సౌందర్యాల రాశి

అందంలో అపర అప్సరస

వాళ్ళను కలపండి

వివాహం చేయండి

అతనివయసు ఇరువది ఐదు

యవ్వనంలో తొణికిసలాడుతున్నాడు

ఆమెప్రాయం ఇరువది మూడు

పరువంలో పరవశించి పోతుంది

ఈడుకుదిరింది

జోడుచేయండి

అతను మాటకారి

చక్కగా మాట్లడుతాడు

ఆమె మౌని

అతితక్కువ మాట్లాడుతుంది

జత కుదర్చండి

జంటగా చెయ్యండి

అతనికి తోడుకావాలి

ఆనందంకోసం చూస్తున్నాడు

ఆమెకు నీడకావాలి

ఆరాటపడుతున్నది

పెద్దలు పెత్తనంచేయండి

పంతులునుపిలిచి పెళ్ళిచేయండి

అతనికి మల్లెపువ్వులంటే ఇష్టం

అంగడిలో కొనాలని కోరికగలవాడు

ఆమెకు పూలమాలంటే మహా ఇష్టం

అల్లుకొని తలలో పెట్టుకోవాలంటుంది

పూదండలు  ఇద్దరిమెడలో వేయించండి

పెళ్ళి తంతును జరిపించండి

అతను భోగలాలసుడు

ఆనందాలకు అర్రులుచాస్తున్నాడు

ఆమె అపరంజిబొమ్మ

ఆకర్షించటంలో సిద్ధహస్తురాలు

ఆ ఇద్దరిని ఒప్పించండి

అంగరంగవైభవంగా వివాహంచెయ్యండి

అతను పెళ్ళికొడుకు

అందంగా తయారయ్యాడు

ఆమె పెళ్ళికూతురు

అలంకరణతో అదిరిపోతుంది

అక్షింతలువెయ్యండి

ఆశీర్వదించండి

అతడు కవి

అందమైన కవితలు వ్రాస్తాడు

ఆమె పాఠకురాలు

అన్నీ ఇష్టంగా చదువుతుంది

అతని చేతికి తాళినిచ్చి

ఆమె మెడలో కట్టించండి

కొత్త కుటీరం

కొత్త కాపురం

కొత్త వాతావరణం

కొత్తలోకం

కోడికూసేదాకా

కోర్కెలు తీర్చుకొనివ్వండి

గుండ్లపల్లి రాజేంద్రప్రసాద్, భాగ్యనగరం