నా ఆనందాలు

కళ్లకు కనువిందుగా — దృశ్యాలు చూడటం

చెవులకు చెలిమిగా — శబ్దాలు వినటం

రుచుల విందుగా — చవులు ఆస్వాదించటం

ఇవన్నీ నాకిస్తాయి మధురానందం

వెలుగుల తారలలా — చిమ్మిన కాంతులు

పూల సుగంధములా — చల్లిన సౌరభాలు

మనసు దోచిన మాధుర్యములా — స్నేహస్పర్శలు

ఇవన్నీ నాకుచేకూరుస్తాయి మధురానందం

వర్షపు చినుకుల్లా — ప్రేమలు కురిపించటం

వసంతపు వీచికల్లా — అభిమానం అందుకోవటం

మిత్రుని కరచాలనంలా — అన్యోన్యంగా మెలగటం

ఇవన్నీ నాకుకలిగిస్తాయి మధురానందం

సంభాషణలలో — జ్ఞానవీణ మ్రోగటం

స్వాగతాలలో — హృదయదీపం వెలగటం

సన్మానాలలో — సత్కారం సువాసన పూయటం

ఇవన్నీ నాకందిస్తాయి మధురానందం

పూలను పరికించటం — కవిత్వ పుటలలో

వెన్నెలలో విహరించటం — కలల కాగితాల్లో

కడలితరంగాలు వీక్షించటం — ఊహల లోకములో

ఇవన్నీ నాకవుతాయి మధురానందం

రంగుల రమ్యముగా — చిత్రాల అద్దటం

హంగుల హరివిల్లులా — అందాలను దిద్దటం

పొంగుల పండుగలా — ఉత్సవాలు వీక్షించటం

ఇవన్నీ నాకొసగుతాయి మధురానందం

నవ్వుల నక్షత్రాల్లా — ముఖములు వెలిగించటం

చిరునవ్వుల చినుకుల్లా — మోములు పూయించటం

సహాయం చేయటం — సూర్యరశ్మిలా నడిపించటం

ఇవన్నీ నాపాలిట మధురానందం

ఆటలలో ఉల్లాసం — పిల్లల హాసం

పాటలలో మాధుర్యం — గానసుధాస్వాదనం

బాటలు చూపటంలో — దీపస్తంభ ప్రకాశం

ఇవన్నీ నామదికిస్తాయి మధురానందం

అక్షరాల అల్లికలో — ముత్యాల జాబిలి

పదాల పేర్పులో — కవిత్వ కుసుమమాల

సాహిత్య స్రవంతిలో — మనసు మునక

అవన్నీ నాకుప్రసాదిస్తాయి శాశ్వతానందం

విఙ్ఞానం పంచటం — జ్ఞానదీపమై

వినోదం కలిగించటం — హాసరసమై

విషాదం తొలగించటం — ఆశాకిరణమై

అవన్నీ నాకెప్పటికీ మధురానందం

చేవ ఉన్నంతవరకు — కలం నడిపిస్తా

ప్రాణం ఉన్నంతవరకు — అందాలు పంచుతా

ఊహలు ఊరేంతవరకు — గీతాలు కూర్చుతా

సాహితి సహకరించేంతవరకు — కవితానందం అందిస్తా

గుండ్లపల్లి రాజేంద్రప్రసాద్, భాగ్యనగరం