మాటల మాధుర్యం

ఊసులు ఆడుతా —

ఊరంతా ఉయ్యాలలూగేలా,

ఊహల ఊటలు ఉప్పొంగేలా

హృదయాలను హత్తుకునేలా॥

ముచ్చట్లు చెబుతా — 

మమతల మల్లెలు పరిమళించేలా,

మురిపాల మధురిమలతో 

మనసులను మురిసించేలా॥

కబుర్లు పంచుతా — 

కలిసిమెలిసి బంధాలను బలపరచేలా,

కాలపు జ్ఞాపకాలను 

కళ్లముందు నిలిపేలా॥

వార్తలు వెల్లడిస్తా — 

వాస్తవాలను వెలికితీసేలా,

వివేకపు వేదికపై

విజ్ఞానదీపాలు వెలిగేలా॥

బాతాఖాని కొనసాగిస్తా — 

బరువైన మనసులు తేలికపడేలా,

బంధుత్వపు బాటల్లో 

బాసటగా నిలిచేలా॥

సంగతులు తెలుపుతా — 

సత్యసౌరభాలు వెదజల్లేలా,

సమాజ స్పందనలు పంచేలా,

సర్వులను సంతసింపజేసేలా॥

ఇష్టఘోష్టి కొనసాగిస్తా — 

ఇష్టాల ఇంద్రధనుస్సులు విరిసేలా,

ఇచ్చిపుచ్చుకునే ఆలోచనలకు 

కొత్త దారులు వేసేలా॥

మాటలు విరజిమ్ముతా —

మధురానుభూతుల ముత్యాలు చల్లేలా,

మనసు గాయాలకు 

మమతల మందుగా మారేలా॥

నవ్వులు పూయిస్తా — 

నిత్య వసంతాలు విరిసేలా,

నిరాశ మేఘాలను 

నిమిషంలోనే తరిమేసేలా॥

చర్చలు సాగిస్తా — 

చైతన్యచిగురులు తొడిగేలా,

చదువుకున్న ప్రతి అనుభవం 

జీవనపాఠాలు నేర్పేలా॥

మాటలు మంచివైతే 

మానవత్వం పరిమళిస్తుంది,

మాటలు మధురమైతే 

ప్రపంచమే ఒక కుటుంబమవుతుంది॥

ఊసులు ఆడుతా... ముచ్చట్లు చెబుతా...

మాటలతో మమతల వంతెనలు నిర్మిస్తా;

కబుర్లు పంచుతూ... హృదయాలను కలుపుతూ...

మానవత్వపు పరిమళాలను వెదజల్లుతా॥

గుండ్లపల్లి రాజేంద్రప్రసాద్, భాగ్యనగరం.