ఆరిపోయేదీపం

దీపాలు ఆరిపోతాయి

దేహాలు కాలిపోతాయి

చేతలు మిగిలిపోతాయి

వ్రాతలు నిలిచిపోతాయి

తప్పదు తప్పదు

పుట్టిన ప్రతివారు

చితిలో కాలకతప్పదు

బూడిదగామారక తప్పదు

చచ్చినా బతికుండవలె

మంచిపనులు చేయవలె

గురుతులు మిగల్చవలె

చిరంజీవిగా మిగిలిపోవలె

కూడదు కూడదు

అనామకుడిగా అంతరించకూడదు

చేయవలె ఘనమైనపనులు

లోకాననిలపవలె చెరగనిముద్రలు

కళ్ళతో చూచినవాటిని

చెవులతో విన్నవాటిని

నోటితో చెప్పినవాటిని

అక్షరాలలోదాచి అందరికందిస్తా

ఆలోచనలను పారించి

భావాలను పుట్టించి

కాగితాలపై కెక్కించి

కమ్మనికవితలు సృష్టిస్తా

అక్షరకుసుమాలతో అల్లి

పదాలనుపారించి పొసగి

అంతరంగాన్ని మదించి

అద్భుతకవితలను  ఆవిష్కరిస్తా

అందరికిని

అందాలుచూపించి

ఆనందాలు కలిగించి

అందరిమదులలో నిలచిపోతా

పువ్వులకవితలను పుటలపై పెడతా

పడతుల ప్రణయాన్ని పేజీలకెక్కిస్తా

ప్రకృతి అందాలను పేపర్లపైపెట్టేస్తా

ప్రజలమనసులలో పదికాలాలు నిలచిపోతా

మీ కవిని

మీ మదిని

మీ హృదిని

మీ ప్రతిబింబాన్ని

మంచికవితలను మరవకండి

మరలామరలా తలచుకోండి

మనసులో నిలుపుకోండి

మాటిమాటికి మననంచేసుకోండి

ఉన్నంతకాలం

ఉన్నతమైనపనులు చేయండి

ఉర్వీజనులను

ఉద్ధరించటానికి యత్నించండి

గుండ్లపల్లి రాజేంద్రప్రసాద్, భాగ్యనగరం