తెరచి చూడు

తలుపు తెరచి చూడు — తరలి వచ్చిన అతిథిని,

తులసి పరిమళంలా ఆహ్వానించు,

మనసారా పలకరించు, 

మాటలతో మమతల హారతి ఇవ్వు॥

కళ్ళు తెరచి చూడు — ప్రకృతి సోయగాల్ని దర్శించు,

పొద్దుతిరుగుడు నవ్వును చూడు,

చుక్కల చీర కట్టిన ఆకాశాన్ని ఆస్వాదించు,

ప్రపంచపు అందాలలో పరవశించు॥

జేబు తెరచి చూడు — దరిద్రుని కన్నీటి తుడువు,

ఆకలికి అన్నమై మారు,

చేతి దానం అందించు,

జీవితం జయగానం పాడుతుందని చాటు॥

పుస్తకం తెరచి చూడు — కవి హృదయం తెలుసుకొను,

అక్షరాల ఆవేదన ఆలకించు,

పదాల పరిమళంలో తేలు,

భావాల భువిలో విహరించు॥

హృదయం తెరచి చూడు — ప్రేమానురాగాలు పంచు,

క్షమను కౌగిలించుకొను,

మనుషుల మధ్య మమతల వంతెన కట్టు,

స్నేహ సుధలను జలజలా కురిపించు॥

కలం తెరచి చూడు - అక్షర చినుకులు రాల్పించు,

పద పంక్తులు పారించు,

భావాలు బయటపెట్టు;

పాఠకుల హృదయాలు దోచుకొను॥

తెరవడం నేర్చుకున్న జీవితం —

తేజోమయమై వెలుగుతుందని గ్రహించు,

మూసుకుపోయిన మనసుకన్నా

తెరచిన హృదయమే జగతికి నిజమైన స్వర్గద్వారమని చాటి చెప్పు॥

✍️ గుండ్లపల్లి రాజేంద్రప్రసాద్, భాగ్యనగరం.