ఓ గాయకా! నీవు గళం విప్పితే!

నీవు గళం విప్పితే —

గగనమే పులకించాలి,

గాలులే పరవశించాలి,

పూలవానలో లోకమే తడవాలి!

నీవు గొంతెత్తి పాడితే —

గుండెలే ఊగాలి,

గడియలే పండాలి,

గానతరంగాలపై మనసులే తేలాలి!

నీవు రాగాలు తీస్తే —

రాళ్లే కరిగిపోవాలి,

స్వరజల్లుల్లో బాధలే కరగాలి,

సంగీత సుధతో జీవితం నిండాలి!

నీవు కంఠం ఎత్తితే —

నింగే స్వరం కావాలి,

నీ భావం మధురగీతం కావాలి,

మూగబోయిన ఆశలన్నీ పలకాలి!

నీవు సరిగమలు అందుకుంటే —

స్వరలోకం మురవాలి,

సప్తస్వరాల సోయగంతో సరస్వతీ నవ్వాలి,

నీ సంగీత సౌరభంతో దిక్కులే నిండాలి!

నీవు నాదాలు పలికితే —

పూలవాన కురవాలి,

మౌనమే మురవాలి,

నీ పలుకే మధురమంత్రం కావాలి!

నీవు గీతం ఆలపిస్తే —

గుండెలో మోగాలి,

వెన్నెలై సాగాలి,

నీ గానంతో లోకమే లేవాలి!

గుండ్లపల్లి రాజేంద్రప్రసాద్, భాగ్యనగరం.