చెట్లు 

చెట్లకు కొమ్మలు పుడితే —

చేతులెత్తి పిలిచినట్టే!

చెట్లకు చిగుర్లు తొడిగితే —

చిగురాశలు చిగురించినట్టే!

చెట్లకు పువ్వులు పూస్తే —

ప్రకృతే నవ్వుల పూలు చల్లినట్టే!

చెట్లకు కాయలు కాస్తే —

భూమాత ఒడిలో సంపద పండినట్టే!

చెట్లకు గాలి తగిలితే —

సరిగమల సవ్వడి వినిపించినట్టే!

చెట్ల కొమ్మలు ఊగితే —

ఆనందంతో నాట్యమాడినట్టే!

చెట్ల ఆకులు గలగలలాడితే —

అమృతగీతాలు ఆలపించినట్టే!

చెట్ల నీడన సేదదీరితే —

అమ్మ ఒడిలో ఒదిగినట్టే!

చెట్లకు డబ్బులు పండితే —

ధనవంతులమైనట్టే!

చెట్లకు నోట్లే కాస్తే —

గల్లాపెట్టెలు నోట్లతో నిండినట్టే!

పేదరికమే పలాయనమైతే —

ప్రతి గడపా పండుగైనట్టే!

కష్టాలన్నీ కరిగిపోతే —

కలల రాజ్యం కళ్లముందున్నట్టే!

కానీ... ఒక్క క్షణం ఆలోచించు —

కాసుల చెట్లే నిజమైతే,

కష్టపడే చేతులు ఏమవుతాయి?

శ్రమను నమ్మే గుండెల మాటేమవుతుంది?

ధనమే దైవమై నిలిచిపోతే,

మానవత్వపు విలువేమవుతుంది?

చెట్లు డబ్బులివ్వకపోయినా —

చల్లని నీడను పంచుతాయి!

చేతినిండా కాసులివ్వకపోయినా —

చెట్లు కడుపునిండా ఫలాలనిస్తాయి!

ఊపిరి పోసే ప్రాణవాయువునిచ్చి —

ఉన్నతమైన జీవనాన్నిస్తాయి!

ప్రతిఫలమాశించని త్యాగంతో —

ప్రకృతి ప్రేమను చాటుతాయి!

చెట్లకు డబ్బులు పండకపోవచ్చు —

చెట్లతోనే బతుకులు పండవచ్చు!

చెట్లకు నోట్లు కాయకపోవచ్చు —

చెట్లతోనే ధనాన్ని ఆర్జించవచ్చు!

చెట్లను పెంచితే ప్రకృతి నవ్వుతుంది —

చెట్లను నరికితే భవిత వణుకుతుంది!

చెట్ల విలువను గుర్తిద్దాం — 

వాటి గొప్పదనాన్ని తెలుసుకుందాం!

చెట్లను కాపాడటమే మన ధర్మం —

పచ్చని భూమిని అందించటమే మన కర్తవ్యం!

— గుండ్లపల్లి రాజేంద్రప్రసాద్,  భాగ్యనగరం.