గానామృతం

ఓంకారనాదాలు చేయనా —

ఒలికే బ్రహ్మతత్త్వం పలుకనా,

ఆదిమధ్యాంత రహిత స్వరంతో

అంతరంగాలను వెలిగించనా॥

వీణానాదాలు మీటనా —

విద్యాదేవిని స్తుతించనా,

తంతులతాకిడిలో తీయనిభావాలు

హృదయ తరంగాలుగా పారించనా॥

శంఖారావాలు పూరించనా —

శుభవేళల సందేశాలు చాటనా,

మంగళధ్వనుల మకరందాన్ని

మనసుల తోటల్లో చల్లనా॥

గాంధర్వగానాలు వినిపించనా —

గగనవీధుల్లో విహరించనా,

స్వరసుధల జలపాతాలతో

శ్రోతల హృదయాలు తడిపెయ్యనా॥

శ్రావ్యరాగాలు సంధించనా —

శృతిలయాల సేతువులు కట్టనా,

సప్తస్వరాల సోయగాలతో

సంగీతసరస్సును నింపనా॥

కూనిరాగాలు తీయనా —

కోకిలగానపు మాధుర్యం పంచనా,

చిరునవ్వుల చిగురాకులపై

చినుకుల పాటలు కురిపించనా॥

ప్రేమగీతాలు ఆలపించనా —

ప్రణయసుధలను పారించనా,

రెండు హృదయాల మధ్యన

అనురాగ దీపాలు వెలిగించనా॥

భక్తిగీతాలు పాడనా —

భవసాగరానికి పడవనవ్వనా,

దైవనామ స్మరణామృతంతో

భక్తుల మనసులు పులకింపజేయనా॥

జనగళాలు ఎత్తుకోనా —

జన్మభూమి జయగాథలు పలుకనా,

సమతా సందేశాల సవ్వడిగా

సమాజ శ్రేయస్సు కోరనా॥

విప్లవగళాలు నినదించనా —

వివేక జ్యోతులు రగిలించనా,

అన్యాయాల అంధకారంపై

అక్షరాయుధమై నిలవనా॥

మనసుపాట ముందుంచనా —

మానసాలను మురిపించనా,

హృదయవీణ తంత్రులపై

భావరాగాలు పలికించనా॥

జీవితపాట వెలువరించనా —

జీవనసత్యాలు తెలుపనా,

అనుభవాల అక్షరమాలికతో

ఆదర్శమార్గాలు చూపించనా॥

గానం నా గుండె ఆక్రందం —

స్వరం నా జీవన స్పందనం,

పాటే నా ప్రాణనాదం —

పరమానందమే నా గానామృతం॥

సప్తస్వరాల సౌరభాలతో

సకల జగతిని అలరించనా,

మానవత్వ మాధుర్యాన్ని

మధుగీతమై వినిపించనా॥

గుండ్లపల్లి రాజేంద్రప్రసాద్, భాగ్యనగరం.