అక్షరాల ఆనంద నర్తనం

రవి ఉదయిస్తున్నాడు —

ఉర్విని మేల్కొలుపుతున్నాడు!

కవి కదం తొక్కుతున్నాడు —

చవుల్ని చిందిస్తున్నాడు!

జాబిలి జతను రమ్మంటుంది —

కౌముది కబుర్లు చెబుతానంటుంది!

చల్లని గాలి వీచుతున్నది —

చక్కని చెలి పిలుస్తున్నది!

మాటలు మురిపిస్తున్నాయి —

మనసును మైమరపిస్తున్నాయి!

పలుకులు ప్రేరణనిస్తున్నాయి —

ప్రతిభకు రెక్కలిస్తున్నాయి!

అక్షరాలు అల్లుకుంటున్నాయి —

అందమైన పదాలవుతున్నాయి!

ఊహలు ఊరుతున్నాయి —

ఉల్లాసభావాలు జనిస్తున్నాయి!

కరాలు కదులుతున్నాయి —

కలాలు కయితలు కూరుస్తున్నాయి!

కమ్మదనాలు కారుతున్నాయి —

కవితా కుసుమాలు విరుస్తున్నాయి!

గళాలు విప్పుకుంటున్నాయి —

గానామృతాలు కురిపిస్తున్నాయి!

కాగితాలు నిండిపోతున్నాయి —

కొత్త అర్థాలు స్ఫురిస్తున్నాయి!

పువ్వులు విరబూస్తున్నాయి —

నవ్వులు చిలకరిస్తున్నాయి!

పరిమళాలు వ్యాపిస్తున్నాయి —

హృదయాలు పులకిస్తున్నాయి!

పద్యాలు పసందును పంచుతున్నాయి —

గద్యాలు జ్ఞానాన్ని పెంచుతున్నాయి!

పాటలు పరవశింపజేస్తున్నాయి —

కవితలు కమ్మదనాన్ని పంచుతున్నాయి!

అందాలు అలరిస్తున్నాయి —

ఆనందాలు వెల్లివిరుస్తున్నాయి!

ఊహలు రెక్కలు విప్పుతున్నాయి —

ప్రేమభావాలు చిగురిస్తున్నాయి!

వాగ్దేవి దీవెనలతో —

వాక్సుధలు జాలువారుతున్నాయి!

అక్షరాల ఆనంద నర్తనంతో —

అంతరంగాలు అలరారుతున్నాయి!

గుండ్లపల్లి రాజేంద్రప్రసాద్, భాగ్యనగరం.