🔥 నిజం – నిత్యజ్యోతి 🔥 

నిజం కనబడుతుంది — అబద్ధపు చీకటిలో దీపమై,

నిజం వినబడుతుంది — మౌనపు గుండెల్లో మంత్రమై,

నిజం తెలుస్తుంది — దట్టమైన అడవుల్లో దారియై,

నిజం నిలుస్తుంది — కాలపు కొండశిఖరాలపై పతాకమై.

నిజం కాపాడుతుంది — నీతి కవచంలా మనిషిని,

నిజం నడిపిస్తుంది — ధర్మపథంలో జీవనాన్ని,

నిజం పలికిస్తుంది — న్యాయపు గొంతుకను గర్జనగా,

నిజం కరిగిస్తుంది — సున్నిత మదులను వెన్నలా.

నిజం గెలిపిస్తుంది — ఓటమి ఒడ్డున పోరాటాన్ని,

నిజం నిప్పవుతుంది — మాయపు మబ్బులు కాల్చటానికి,

నిజం నిలకడైనది — వేగిరపడని నిదానపు గమనం,

నిజం కత్తిలాంటిది — న్యాయాన్ని కాపాడే ఆయుధం.

నిజం ఒక్కోసారి నిష్టూరం, ఒక్కోసారి నిదానం,

నిజం ఒక్కోసారి అంగారం, ఒక్కోసారి అందలం,

నిజం దాస్తే దహిస్తుంది, శిక్షిస్తుంది, శపిస్తుంది —

నిజం చెబితే రక్షిస్తుంది, లాలిస్తుంది, మురిపిస్తుంది.

నిజం నడిచే చోట — నీడలే నడక నేర్చుకుంటాయి,

నిజం నిలిచే చోట — దేవతలే తలవంచి దండం పెడతారు,

నిజం ఒక మాట కాదు — ఒక మార్గం, ఒక మంత్రం, ఒక బలం,

నిజం మనసులో ఉంటే — మనిషే దేవుడవుతాడు — అదే సత్యసౌరభం…

నిజరూపం చూపిస్తా - నిజధ్యానం చేయిస్తా,

నిజవేషం బయటపెడతా - నిజమూల్యం చెల్లిస్తా,

నిజాన్ని నీరుకారిస్తే - బడబానలాన్ని పారిస్తా,

నిజాన్ని తొక్కాలనిచూస్తే - ఉగ్రరూపాన్ని దాలుస్తా.🌼

✍️ గుండ్లపల్లి రాజేంద్రప్రసాద్, భాగ్యనగరం ✍️