పుస్తకం - అక్షరామృత కలశం

పుస్తకం — 

కళ్లకు అందాలు చూపి,

అక్షరాల అద్దంలో ప్రకృతిని ప్రదర్శించాలి,

లోకాన్ని అంతరంగాల్లో ప్రతిబింబించాలి.

పొస్తుకం — 

మనసుకు ఆనందం ఇచ్చి

సంతోషపు పూలు పూయించాలి,

భావాల తోటలో రంగులు వెదజల్లాలి.

గ్రంథం — 

కర్ణాలకు శ్రావ్యత కలిగించి

మౌనానికీ సంగీతం నేర్పాలి,

జీవన రాగం వినిపించాలి.

కితాబు — 

నోర్లకు తేనెచుక్కలు అందించి

పదాల మాధుర్యం పంచాలి,

పఠనమే పానీయమై కడుపులకు తృప్తినివ్వాలి.

బుక్కు — 

గుండెలకు లయ నేర్పి 

వేదనలకు తాళం వెయ్యాలి,

గమ్యాలను తెలియజేసి జీవితాన్ని నడిపించాలి.

పుస్తం — 

హృదయాలను తాకి

ఉత్తమ భావాలకు ప్రాచుర్యం కలిగించాలి,

ఒక శాశ్వత చిరునామా ఇవ్వాలి.

పుస్తి— 

మోములపై వెలుగులు చిమ్మి, నవ్వించి

జీవన పోరాటం చేయించాలి.

విజయానికి మార్గం చూపాలి.

పొస్కం — 

దేహాల్లో ప్రాణం నిలిపి,

అక్షరాలతో ఊపిరి పొయ్యాలి

మనిషిలో మనిషిని మేల్కొలపాలి.

పొస్తకం — 

ఖడ్గం కాదు

హస్తాలకు భూషణం కావాలి,

భాషకు ప్రతీకగా మారాలి.

పొత్తం - 

అక్షరామృత కలశం,

లిఖిత పదాల సంపుటం,

కవుల భావాల సమ్మిళితం.

గుండ్లపల్లి రాజేంద్రప్రసాద్, భాగ్యనగరం.