నా దారి – అక్షరసుపథం

దారిని కనిపెట్టాలని ఉన్నది —

గమ్యం అనే కలను

అడుగుల ముందే నిలిపి

త్వరగా చేరవేయాలని ఉన్నది.

దారిని చూపాలని ఉన్నది —

చీకటి మలుపుల్లో

ధైర్యం అనే దీపాన్ని

మనసుల చేతుల్లో వెలిగించాలని ఉన్నది.

దారిని మలచాలని ఉన్నది —

తప్పుదోవల వంకరలను

సరైన దిశగా తిప్పి

నిశ్శబ్దంగా సరి చేయాలని ఉన్నది.

దారిని చెయ్యాలని ఉన్నది —

అలసిన అడుగులకు ఆశ్రయమై

ప్రయాణమే గురువయ్యేలా

జీవనానికి నిలకడ నేర్పాలని ఉన్నది.

దారిని పట్టించాలని ఉన్నది —

వంచనల వలల్ని విడదీసి

నిజానికి సూటి మార్గాన్ని

అడుగుల కింద పరచాలని ఉన్నది.

దారిని కాచాలని ఉన్నది —

నిద్రపోని కళ్లతో

దోపిడీ చేసే ఆలోచనల్ని

మొగ్గలోనే తుంచేయాలని ఉన్నది.

దారికి తేవాలని ఉన్నది —

జీవితపు చెల్లాచెదురు క్షణాల్ని

ఒక అర్థవంతమైన పథంగా

సరిదిద్దాలని ఉన్నది.

దారిని వెంబడించాలని ఉన్నది —

ముష్కరుల ఆటల్ని

సత్యపు వెలుగులో నిలబెట్టి

నిర్వీర్యం చేయాలని ఉన్నది.

అక్షరాల దారిన నడవాలని ఉన్నది —

మదిలో మరిగే భావాల్ని

మౌనాన్ని చీల్చి

పదాలుగా మలచాలని ఉన్నది.

కవితా దారిని పట్టాలని ఉన్నది —

కమ్మని అనుభూతుల్ని

లయలో కూర్చి

మనసులకు చేరవేయాలని ఉన్నది.

నా దారి

కేవలం రహదారి కాదు —

అది జీవితాన్ని సరిదిద్దే

అక్షరాల శాశ్వత మార్గం.

నా దారి

లక్ష్యాలను చేర్పించే సుపథం,

విజయాలను చేకూర్చే సన్మార్గం,

జీవితాలను గెలిపించే అక్షరాల సత్సంచారం. 

—గుండ్లపల్లి రాజేంద్రప్రసాద్, భాగ్యనగరం.