వసంత మాసం వస్తుంది

వసంత మాసం వస్తుంది

విరహాల ముసుగులు తొలగిస్తుంది,

చెమ్మ చేక్కిన నేలపై

పచ్చని చిరునవ్వులు చిందిస్తుంది.

మామిడి పూతలు, పిండెలు,

ఫలాలు ఆశలులేపి నోరూరిస్తాయి,

కోయిల కూయలు

మనసుల తాళాలు తట్టుతుంది.

మల్లె పూల పరిమళం

మౌనంగా మాటలాడుతుంది,

సాయంత్రపు గాలిలో

మనసులను మత్తెక్కిస్తుంది.

ఎండలు పెరిగి నవ్వుతాయి,

చల్లని గాలి పారిపోతుంది, 

ఎండిపోయిన ఆశల కొమ్మలపై

కొత్త పూతలు మొలిపిస్తుంది. 

పూల తోటల పల్లవాలు

రంగుల కలల్ని నింపుతాయి,

మనసు నిండా ఉల్లాసాన్ని

వసంతం వర్షంలా కురిపిస్తుంది.

జీవితానికే పునర్జన్మనిచ్చేలా,

వసంత మాసం వస్తుంది,

హృదయాల అంచుల్లో

ఆనంద దీపాలు వెలిగిస్తుంది. 

గుండ్లపల్లి రాజేంద్రప్రసాద్, భాగ్యనగరం.