అక్షరయానం

నుదిటిపై అక్షరాలు —

దేవుని విధిరాతలు,

నాలుకపై అక్షరాలు —

భావాలకు శ్రావ్యస్వరాలు.

నామకరణ రోజున బియ్యంపై రాసిన అక్షరాలు —

జీవితానికి తొలి చిరునామా,

అక్షరాభ్యాసంనాడు దిద్దిన బీజాక్షరాలు —

జ్ఞానానికి తెరిచిన తలుపులు.

పలకపై అక్షరాలు —

చిన్న చేతుల కలల గుర్తులు,

మట్టిపై అక్షరాలు —

చిన్నారుల సాధనకు తొలి చిహ్నాలు.

నీటిపై అక్షరాలు —

క్షణభంగుర సత్యాలు,

నోటుబుక్కుపై అక్షరాలు —

ఆశల్ని దాచుకున్న రహస్యాలు.

నల్లబోర్డుపై అక్షరాలు — గురువు చూపిన గీతల్లో

జీవితానికి దారి చెప్పే బుద్ధి బీజాలు.

ఇసుకపై అక్షరాలు — అలలొచ్చి చెరిపినా

మానస తీరాల్లో మిగిలిపోయే జ్ఞాపకాలు.

ప్రశ్నాపత్రాలపై అక్షరాలు — గుండెల్ని తడిపే

భయం–ధైర్యాల పరీక్షాకాలాలు.

సమాధానపేజీలపై అక్షరాలు — ఆలోచనల చెమటతో

సాధనకు ఫలమిచ్చే విజయ మార్గాలు.

లేఖపై అక్షరాలు —

దూరాల్ని దగ్గరచేసే ప్రేమ తార్కాణాలు,

పుస్తక పుటలపై అక్షరాలు —

తర తరాల్ని వెలిగించే దీపాలు.

శిలాఫలకంపై అక్షరాలు —

చెరపలేని శాశ్వత ఘనతలు,

సమాధిరాళ్లపై అక్షరాలు —

పెద్దలను గుర్తుకుతెచ్చే మాటలు.

పత్రికల్లో అక్షరాలు — సమాజ నాడిని పట్టే

నిజాల నిప్పులు, అబద్ధాల తెరలు.

టీవీల్లో అక్షరాలు — కళ్ల ముందే పరుగు తీసే

సమయానికి అద్దం పట్టే క్షణిక ప్రతిబింబాలు.

ఇలా… అక్షరాలు మనతోనే పుడతాయి,

మనతోనే పెరుగుతాయి,

మనసు చివరిపుట మూసేవరకు

మనల్ని మనతోనే చదివిస్తాయి.

అక్షరాలు —

మన ఊపిరి పలుకులు,

మన ఆలోచనల బాటలు,

మన భవిష్యత్తు వెలుగులు.

అక్షరాలను ప్రేమిద్దాం,

అర్థాలను గౌరవిద్దాం,

పదాలకు ప్రాణమిద్దాం,

మనసుల్ని వెలిగిద్దాం.

గుండ్లపల్లి రాజేంద్రప్రసాద్, భాగ్యనగరం.