ముక్కుల రాజకీయం (రాజకీయ వ్యంగం)

ముక్కోడు వచ్చాడు —

మాటలతో కాదు

ముక్కుతోనే హామీలవాసన చూపిస్తూ.

ముక్కోపి వచ్చాడు —

ఓటర్లు ప్రశ్నలు అడిగితే

ముక్కు ఎగిరేలా అరుస్తూ కరుస్తూ.

ముక్కుపచ్చలారనోడు వచ్చాడు —

పేదల కన్నీటివాసన పట్టని చిరునేతగా, 

తండ్రికి ప్రతినిధిగా వత్తాసు పలుకుతూ. 

ముక్కుతో మాట్లాడేవాడు వచ్చాడు —

నోరు తెరిస్తే నిజం జారిపోతుందనుకుని

నాసికతోనే నీతుల ఉపన్యాసం చేస్తూ.

కోటేరు ముక్కోడు వచ్చాడు —

ఐదేళ్ల పాలనను

ఐదు నిమిషాల కథలా చెప్పేస్తూ.

చీమిడి ముక్కోడు వచ్చాడు —

చీమంత తప్పుకే

దేశద్రోహం ముద్ర వేస్తూ.

ముక్కు మూసుకున్నవాడు వచ్చాడు —

అవినీతి దుర్వాసన తనదాకా రాకుండా

ముక్కుమీద వేలు వేసుకుంటూ.

ముక్కును మూసేవాడు వచ్చాడు —

ప్రజల ప్రశ్నలకు 

మౌనానికి మాస్క్ వేస్తూ.

ముక్కును పగలకొట్టేవాడు వచ్చాడు —

ఎదిరించిన ప్రతి ముక్కుపై

లాఠీల వర్షం కురిపిస్తూ.

ముక్కుకు ముక్కురాసేవాడు వచ్చాడు —

గౌరవాన్ని పథకాల పేరుతో

కాగితాలకే కట్టేస్తూ.

ముక్కును నేలపైరాసేవాడు వచ్చాడు -

పాత తప్పులకు క్షమాపణ కోరుతూ,

కొత్త నాటకానికి తెరతీస్తూ.

ఎన్నికల మేడపై

ముక్కులే నాయకులయ్యాయి,

మనుషుల అవసరాలు పాదాల కింద పడేసాయి.

చివరికి ప్రజలు అడిగారు —

“ముక్కు గెలిచింది…

కానీ మా ఊపిరి ఎప్పుడు గెలుస్తుంది? అని”

గుండ్లపల్లి రాజేంద్రప్రసాద్, భాగ్యనగరం.