అక్షర తోరణాలు

మామిడి తోరణాలు —

ముంగిట మంగళ శోభను పరచే పచ్చని ఆశలు;

పువ్వుల తోరణాలు —

పరిమళాలతో పండుగలకు స్వాగతం పలికే ప్రేమలహరులు॥

అరుణ తోరణాలు —

ఆకాశాన ఉదయరాగాలను అల్లే సూర్యకిరణాలు;

అక్షర తోరణాలు —

అంతరంగాల గుమ్మాలకు ఆనందాలను అలంకరించే కవితామాలలు॥

మల్లెల తోరణాలు —

మనసులను మత్తెక్కించే మాధుర్య గంధాలు;

మమతల తోరణాలు —

మనుషుల మధ్య బంధాలను బలపరిచే బంగారు వంతెనలు॥

చిరునవ్వుల తోరణాలు —

చీకట్ల గుమ్మాలను వెలుగులతో నింపే వెన్నెలలు;

చిరు పలుకుల తోరణాలు —

చిరకాల స్నేహాలకు చిరునామాలయ్యే ముత్యాల సరాలు॥

కలల తోరణాలు —

కనురెప్పల గడపపై కాంతులను కురిపించే ఇంద్రధనుస్సులు;

కవితా తోరణాలు —

కాలపు గుండెలపై కళాత్మకంగా నిలిచే అక్షర శిల్పాలు॥

ప్రేమ తోరణాలు —

ప్రాణాల గుమ్మానికి పరిమళాలు పూయించే పుష్పహారాలు;

ప్రణయ తోరణాలు —

ప్రతి హృదయాన్ని స్వర్గసీమగా మార్చే మధురానుభూతులు॥

తెలుగు తోరణాలు —

తేనెలొలికే తల్లి భాషకు తిలకమయ్యే అక్షరవల్లులు;

సాహిత్య తోరణాలు —

సంస్కృతికి సిరిసంపదలు చేకూర్చే సరస్వతీ హారాలు॥

జీవిత తోరణాలు —

జ్ఞాపకాల జాజులతో జతకట్టిన అనుభవాల దండలు;

అనుబంధ తోరణాలు —

ఆత్మలను ఒక్కటిగా అల్లే అపురూప అనురాగమాలలు॥

తోరణమంటే —

తలుపుకు కట్టిన అలంకారం మాత్రమే కాదు;

హృదయ గుమ్మాలకు వేలాడదీసిన

ఆనందాల ఆహ్వానపత్రం॥

అక్షర తోరణమంటే —

పదాల పంక్తులను పేర్చడం మాత్రమే కాదు;

పాఠకుల హృదయ గుమ్మాన

కవి కట్టిన శాశ్వత స్వాగత తోరణం॥

గుండ్లపల్లి రాజేంద్రప్రసాద్, భాగ్యనగరం.