కాసిని... కావ్య సౌరభాలు!

కాసిని తేనీరు త్రాగి —

తనువుకు సేదనిస్తా,

కాసిని మాటలు విని —

మనసుకు హాయినిస్తా!

కాసిని కబుర్లు చెప్పి —

కలతలను మరిపిస్తా,

కాసిని నిమిషాలు గడిపి —

నవ్వుల పూలు పూయిస్తా!

కాసిని ఆలోచనలు రేపి —

ఊహలకు రెక్కలు తొడుగుతా,

కాసిని అందాలు చూసి —

ఆనందాల హరివిల్లు విరియిస్తా!

కాసిని చినుకులు చిందితే —

చిగురాశలను చిగురింపజేస్తా,

కాసిని చిరుగాలులు వీస్తే —

చింతల మేఘాలను చెదరగొడతా!

కాసిని వెన్నెల కురిస్తే —

ఊహలను హృదిలో ఊరేగిస్తా,

కాసిని మధురిమలు నిండితే —

మదిలో మల్లెలు పూయిస్తా!

కాసిని అక్షరాలు అల్లి —

అందమైన హారాలు కడతా,

కాసిని పదాలు కూర్చి —

భావాల మాలికలు పేర్చుతా!

కాసిని కవితలు రాసి —

కలాలకు రెక్కలు తొడుగుతా,

కాసిని గేయాలు పాడి —

గుండెల్లో గానాలు మోగిస్తా!

కాసిని కావ్యాలు వెలువరించి —

కవితా సౌరభాలు వెదజల్లుతా,

కాసిని కాలాన్ని ఆస్వాదించి —

కమ్మని జ్ఞాపకాలు మూటగట్టుకుంటా!

కాసిని... కాసిని... అంటూ

జీవనయానం సాగిస్తా,

చిన్న చిన్న సరదాలతో

సంతోషాల సుమాలు పూయిస్తా!

అక్షరాక్షరాన అమృతం చిలికే

అపురూప కవితా సృజనతో —

మానవ జీవితాలనే కావ్యాలుగా మలిచి,

ప్రతి క్షణాన సాహితీ సౌరభాలు వెదజల్లుతా!

గుండ్లపల్లి రాజేంద్రప్రసాద్, భాగ్యనగరం.