అక్షరాల అనుభూతులు

శిఖరాల అగ్రాలు ఎక్కుతా —

విజయ జెండా ఎగరేస్తా!

పాతాళంలో పడ్డా పైకి వస్తా —

పట్టుదలతో విధిరాతనే తిరగరాస్తా!

కడలి అలలపై తేలుతా —

కలల నావలో విహరిస్తా!

నీలి గగనాలపై ఎగురుతా —

నక్షత్రాలతో చెలిమి చేస్తా!

ఊహల లోకానికి తీసుకెళ్తా —

ఉల్లాసాల ఊయలలో ఊపుతా!

మనసుల తలుపులను తడతా —

మమతల మకరందం పంచుతా!

చైతన్య దీపాలను వెలిగిస్తా —

చీకటి తెరలను చీల్చుతా!

కలతల గుండెలకు కొండంత అండనిస్తా —

కన్నీటి చుక్కలను తుడుస్తా!

మోడుబారిన మనసుల్లో —

మొలకెత్తే ఆశలను నాటుతా!

ఎండమావుల దారుల్లో —

ఎదురయ్యే ఎడారిని నందనవనం చేస్తా!

కాలగమనాన్ని ఆపలేకున్నా —

కావ్యగమనంతో కాలాన్నే దాటుతా!

మరణం దేహాన్ని మట్టిలో కలిపినా —

మధురాక్షరాలతో మరపురాని జ్ఞాపకమవుతా!

కలం కదిలిస్తా — కావ్యాలు సృష్టిస్తా,

కల్పనలు రగిలిస్తా — కొత్త లోకాలు వెలిగిస్తా!

భావాలు పలికిస్తా — భువనాన్ని పులకిస్తా,

కవితలు విరబూయిస్తా — హృదయాలను పరవశపరుస్తా!

ఊహలకు రెక్కలిస్తా — ఉవ్వెత్తున ఎగరేస్తా!

అక్షరాలకు అంతమెందుకు — అనంతాన్ని ఆవిష్కరిస్తా!

అక్షరాలే నా అస్త్రాలు — అనుభూతులే నా శస్త్రాలు!

భావాలే నా భువనాలు — భాషా వైభవాలే నా విజయతోరణాలు!

గుండ్లపల్లి రాజేంద్రప్రసాద్, భాగ్యనగరం.