జగజ్యోతులు!

సూర్యుని కిరణాలు సృష్టికి వెలుగులు —

చీకట్లను తరిమే దివ్య తేజాలు!

చంద్రుని వెన్నెల మనసుకు హాయులు —

మదులను మురిపించే మధుర భావాలు!

దీపాల కాంతులు ఇంటికి శోభలు —

జీవిత బాటలో ఆశల దీపాలు!

తారల తళుకులు నింగికి అందాలు —

కన్నుల విందుచేసే వజ్రాల మెరుపులు!

మెరుపుల విద్యుల్లతలు మబ్బుల మాయలు —

క్షణకాలంలో విరిసే కాంతి జ్వాలలు!

మోముల నవ్వులు మనసుల మమతలు —

మానవ జీవితాన వెలిగే వెన్నెలలు!

ఉదయపు అరుణిమ ఉత్సాహ కిరణం —

సంధ్యారాగం ప్రకృతి సౌందర్య గానం!

పున్నమి జాబిలి ప్రేమకు ప్రతిరూపం —

పసిపాప నవ్వు ఆనందానికి రూపం పరమానంద స్వరూపం!

సూర్యకాంతిలో శక్తిని చూద్దాం —

చంద్రవెన్నెలలో ప్రశాంతిని పొందుదాం!

దీపపు వెలుగులో జ్ఞానాన్ని పెంచుకుందాం —

చిరునవ్వుల వెలుగుతో ప్రేమను పంచుదాం!

కాంతులెన్నున్నా కన్నులకు విందులే —

కరుణ నిండిన హృదయాలు నిజమైన వెలుగులే!

బాహ్య కాంతులన్నీ తాత్కాలికం ——

అంతరంగ జ్యోతి అజరామరం!

ప్రకృతిలోని కాంతులు

ప్రపంచాన్ని ప్రకాశింపజేస్తే,

మనిషిలోని ప్రేమ, కరుణ, చిరునవ్వులు

జీవితాలను వెలిగిస్తాయి!

గుండ్లపల్లి రాజేంద్రప్రసాద్, భాగ్యనగరం.