వెలుగుల వీరంగాలు!

వెలుగు చీకటిని తరిమేస్తుంది —

విశ్వమంతా కాంతిని విరజిమ్ముతుంది!

భయాల తెరలను తొలగిస్తుంది —

బతుకుకు భరోసానిచ్చి ముందుకు నడిపిస్తుంది!

వెలుగు దిగులును మాయంచేస్తుంది —

దివ్యమైన చిరునవ్వును పూయిస్తుంది!

నిరాశా నిశీధిని పారద్రోలుతుంది —

నిండు ఆశల ఉదయాన్ని చూపిస్తుంది!

వెలుగు లోకాన్ని పరిచయం చేస్తుంది —

వింతవింత వర్ణాలను ఆవిష్కరిస్తుంది!

వినూత్న ఆలోచనలను రేకెత్తిస్తుంది —

విజ్ఞానపు ద్వారాలను తెరిపిస్తుంది!

వెలుగు అజ్ఞానాన్ని అంతం చేస్తుంది —

అంతరంగంలోని చైతన్యాన్ని మేల్కొలుపుతుంది!

అక్షరాల అంతరార్థాన్ని ఆవిష్కరిస్తుంది —

అనుభవాల అమృతాన్ని అందిస్తుంది!

వెలుగు గమ్యాన్ని దర్శింపజేస్తుంది —

లక్ష్యాన్ని చేరే మార్గాన్ని చూపిస్తుంది!

అడుగడుగునా ఆత్మవిశ్వాసాన్నిస్తుంది —

అవరోధాలను అధిగమించే శక్తినిస్తుంది!

వెలుగు విజ్ఞానదీపాన్ని వెలిగిస్తుంది —

వివేకపు వాకిళ్లను తెరుస్తుంది!

వెలుగు ఉన్నచోట వికాసం విరబూస్తుంది —

వెలుగు లేని చోట అజ్ఞానం తాండవిస్తుంది!

వెలుగు ఒక దీపం — చీకటికి శాపం!

వెలుగు ఒక జ్ఞానం — జీవితానికి ప్రాణం!

వెలుగు ఒక మార్గం — విజయానికి సోపానం!

వెలుగు ఒక ప్రేరణం — ప్రగతికి కారణం!

వెలుగును పంచుదాం — చీకటిని పారదోలుదాం!

జ్ఞానజ్యోతులు వెలిగిద్దాం — జగతికి దారిచూపుదాం!

మనలోని చైతన్యాన్ని మేల్కొలుపుదాం —

మానవతా మందిరంలో మహోదయాన్ని ఆవిష్కరిద్దాం!

గుండ్లపల్లి రాజేంద్రప్రసాద్, భాగ్యనగరం.