నిత్యపోరాటాలు!

చీకటిపై వెలుగు సాగించే సమరం —

చెడుపై మంచి చేసే ధర్మయుద్ధం!

అన్యాయంపై న్యాయం ఎగరేసే బావుటా —

అధర్మంపై ధర్మం చేసే తిరుగుబాటు!

ధనిక బీదల మధ్య అంతరాల అగాధం —

పేదరికం పెంచే అసమానతల విషాదం!

కూడు గుడ్డ నీడ కోసం బడుగుల ఆరాటం —

కనీస హక్కుల సాధనకు ప్రజా ఉద్యమం!

ఆడా మగా మధ్య ఆధిపత్య వైరం —

అహంకారాల మధ్య అంతులేని ఘర్షణం!

అధికార ప్రతిపక్షాల రాజకీయ చదరంగం —

పదవుల వ్యూహాలతో సాగే రణరంగం!

దేవతల రాక్షసుల మధ్య భీకర సంగ్రామం —

సత్యాసత్యాల నడుమ ధర్మాధర్మ ఘర్షణం!

అమృతం కోసం సాగిన సాగర మథనం —

దైవాసురుల గాథలో దాగిన తాత్త్విక సందేశం!

దేశాల మధ్య సరిహద్దుల వివాదం —

జాతుల మధ్య ఆధిపత్యపు ఆరాటం!

కులమతాల పేరుతో కలహాల కల్లోలం —

మానవ సంబంధాల్లో మమతల అంతర్ధానం!

మనిషిలో ఆశ నిరాశల అంతర్మథనం —

మనసులో ఆలోచనల నిరంతర ఘర్షణం!

గెలుపోటముల మధ్య జీవిత పయనం —

సంకల్ప బలమే విజయానికి సోపానం!

సవాళ్లను ఎదుర్కొంటేనే ప్రగతి —

అనుభవాల సానతోనే పరిణతి!

ప్రతిఘటన విధ్వంసానికి దారికాకూడదు —

విజయగర్వం మానవత్వాన్ని మింగకూడదు!

చీకటి తెరలను  వెలుగులు చీల్చాలి —

చెడును తరిమేయాలి మంచితనపు కిరణాలు తరిమేయాలి!

అసమానతల స్థానంలో సమభావం వెల్లివిరియాలి —

అన్యాయపు సంకెళ్లు తెగి న్యాయం పరిఢవిల్లాలి!

ద్వేషాగ్నులు చల్లారి ప్రేమామృతం పొంగాలి —

విశ్వమంతా శాంతి సౌభాగ్యాలతో నిండాలి!

గుండ్లపల్లి రాజేంద్రప్రసాద్, భాగ్యనగరం.