దశను మార్చే దిశలు!

దశదిశలు పరికించి మంచి దిశను ఎంచుకో —

దూరదృష్టితో గమ్యాన్ని నిర్దేశించుకో!

మంచి మార్గమేదో ఆలోచించి తెలుసుకో —

ముందడుగులు వేస్తూ విజయాలను సాధించుకో!

ఎటువైపు సాగాలో ఎరుకను పెంచుకో —

ఎదురయ్యే ఆటంకాలను ఎదిరించి నడుచుకో!

ఎంచుకున్న దిశపై ఏకాగ్రత నిలుపు —

ఎన్ని అవాంతరాలొచ్చినా లక్ష్యాన్ని చేరుకో!

గాలివాటానికి గమ్యదిశ మార్చుకోకు —

తాత్కాలిక ప్రలోభాలకు తలవంచకు!

పట్టు విడువక ప్రయాణాన్ని కొనసాగించు —

పరిస్థితులను ఎదుర్కొని ప్రగతిని సాధించు!

దిశలేని పయనం దారితప్పిన బాట —

లక్ష్యంలేని జీవితం వ్యర్థమైన ఆట!

సరైన దిశే విజయానికి తొలిమెట్టు —

సంకల్పబలమే గెలుపునకు కొండంత అండ!

సుదిశలో సాగితే దశ మారుతుంది —

దశ మారితే విజయలక్ష్మి వరిస్తుంది!

చిత్తశుద్ధితో చక్కని దిశలో పయనిస్తే —

చిరకాల కీర్తి నీచెంతకు చేరుతుంది!

గమ్యమే ధ్యేయంగా గమనాన్ని సాగించు —

గగనపు అంచులను అందుకునేవరకు నడువు!

ఆత్మవిశ్వాసమే ఆయుధంగా మలుచుకో —

అవకాశాల నిచ్చెనలెక్కి ఉన్నత దశను అధిరోహించు!

దిశ నీ ఆలోచనకు దిక్సూచి కావాలి —

దశ నీ కృషికి ప్రతిఫలంగా నిలవాలి!

నీ ప్రయాణం నవతరానికి మార్గదర్శి కావాలి —

నీ జీవితం విజయాలకు చిరునామా కావాలి!

గుండ్లపల్లి రాజేంద్రప్రసాద్, భాగ్యనగరం.