వాక్కుల విన్యాసాలు 

కలం ఒకటి చెంతకు వచ్చింది —

కమ్మని కవితను కానుకగా ఇచ్చింది!

అక్షరాల అందాలను అద్దంలో చూపింది —

ఆలోచనల మకరందం మనసుకు పంచింది!

గళం ఒకటి గానమై పలికింది —

గుండెలోని భావాలను పాటగా వినిపించింది!

మధురమైన రాగంతో మైమరపించింది —

మదిలో ఆనంద వీచికలను ప్రసరించింది!

పత్రిక ఒకటి పొద్దున్నే ఇంటికొచ్చింది —

పలుకరించి కవితతో పరవశింపజేసింది!

పదాల పొందికను పరిచయం చేసింది —

పఠనానందపు మధురిమను చేకూర్చింది!

పుస్తకం ఒకటి ముందుకు వచ్చింది —

పదిలమైన భావాల సంపదను అందించింది!

అద్భుతమైన కవితల అమృతం చిలికించింది —

అంతరంగంలో అనుభూతుల దీపం వెలిగించింది!

కవి ఒకరు చెంతకు వచ్చారు —

కవితా మాధుర్యాన్ని ఆస్వాదింపజేశారు!

చక్కని భావాలతో అలరించారు —

చిరస్మరణీయమైన అనుభూతులను మిగిలించారు!

కలం కవితకు ప్రాణం పోస్తుంది —

గళం గీతమై గుండెల్లో నిలుస్తుంది!

పత్రిక సాహిత్యాన్ని పదిమందికి చేరుస్తుంది —

పుస్తకం తరతరాలకు జ్ఞానాన్ని పంచుతుంది!

కవి సృజనకు అక్షరమే ఆలంబనం —

కవితా పఠనానికి భావమే ప్రాణధనం!

కవిత వినడం ఒక మధురానుభవం —

కవిత్వం ఆస్వాదించడం ఓ అపూర్వానందం!

వాణీదేవి కవులను కరుణిస్తుంది —

వీణానాదాలతో వీనుల విందు చేస్తుంది!

వాక్కులకు రసభావాలను అద్దుతుంది —

వినేవారి హృదయాల్లో ఆనందం నింపుతుంది!

గుండ్లపల్లి రాజేంద్రప్రసాద్, భాగ్యనగరం.