కవిత్వంతో...

కొండలకు బాటలేసి అలవోకగా ఎక్కుతా —

కనిపించని శిఖరాలను సునాయాసంగా చేరుతా!

ఆకాశపు అంచులను ఆనందంగా తాకుతా —

అంతరిక్షపు అందాలను ఆశ్చర్యంగా చూస్తా!

గాలిలో విహరిస్తూ గగనాన్ని చుట్టేస్తా —

మేఘాల ముంగిట ముచ్చట్లు సాగిస్తా!

జాబిలమ్మ ఒడిలో జాజిపూలు జల్లుతా —

వెన్నెల విందుల్లో వేడుకగా గడుపుతా!

తారకల తళుకుల్లో తేలుతూ ఆడుతా —

చుక్కలతో చెలిమిచేసి చిందులు వేస్తా!

ధ్రువతార చెంతన దర్జాగా నిలుస్తా—

సప్తర్షుల సన్నిధిలో సంభాషణలు సాగిస్తా!

ఇంద్రలోక వీధుల్లో ఇష్టంగా తిరుగుతా —

అప్సరసల నాట్యానికి ఆనందంగా మురుస్తా!

నందనవనంలో నవరంగ పూలు కోస్తా —

కల్పవృక్షం నీడలో కలల పంటను పండిస్తా!

కైలాస పర్వతాన్ని కళ్లారా దర్శిస్తా —

పరమశివుని సన్నిధిలో పరవశించి నిలుస్తా!

గంగమ్మ జటాజూటంనుంచి జాలువారేజలాన్ని చూస్తా—

నంది నాదాల మధ్య నాదబ్రహ్మను వింటా!

వైకుంఠ వాకిళ్లను వినయంగా చేరుతా —

శ్రీహరి పాదపద్మాల చెంత శిరసు వంచుతా!

ఆదిశేషుని పాన్పుపై అనంతుని దర్శిస్తా —

లక్ష్మీదేవి కరుణామృతం మనసారా గ్రోలుతా!

కాలాన్ని వెనక్కి నడిపించి గతాన్ని చూస్తా —

రేపటి తరాల భవితను ముందుగానే చదువుతా!

సప్తసముద్రాలను సిరాతోనే దాటుతా —

సృష్టికి అందని అద్భుత లోకాలను సృజిస్తా!

కవిత్వమే నా రెక్కలు — ఊహలే నా గుర్రాలు!

అక్షరాలే నా ఆయుధాలు — భావాలే నా బలాలు!

కలం పట్టి కదిలిస్తే కదలని లోకమేదీ?

కవిత్వంతో విహరిస్తే అందని గగనమేదీ?

గుండ్లపల్లి రాజేంద్రప్రసాద్, భాగ్యనగరం.