పొంగుల పరవళ్లు!

పొయ్యిమీద పాలు పొంగితే శుభసూచకం —

పల్లెల్లో పండుగలకు, గృహప్రవేశాలకు ఆరంభం!

ప్రాయం పొంగితే మనసులో పరవశం —

పడుచు హృదయాల్లో ప్రేమానురాగాల చిగురింత!

నదులు పొంగితే పొలాలకు జలకళ —

నవజీవన సిరులు చిందే పుడమితల్లి మురిపెం!

వాగులు పొంగితే వనాలకు వన్నెలు —

వసుధపై విరిసిపడతాయి పచ్చని సొగసులు!

హృదులు పొంగితే అనురాగాల వెల్లువ —

అనుబంధాల మధ్య ఆత్మీయతల కలయిక!

ఆనందం పొంగితే పెదవులపై చిరునవ్వు —

ఆప్యాయతలు పంచితే అంతులేని మధురానుభూతి!

ఊహలు పొంగితే అద్భుతాల ఆవిష్కరణ —

ఆలోచనలు సాగిస్తాయి సృజనాత్మక ప్రయాణం!

కరుణ పొంగితే మానవత్వానికి ఆధారం —

క్షమ పొంగితే శాంతికి సరికొత్త సౌధం!

కవితలు పొంగితే అక్షరాలకు అభిషేకం —

కవితా హృదయంలో భావాల మధురసంగమం!

కలం నుంచి జాలువారే కమ్మని కావ్యాలు —

పాఠకుల హృదయాలలో నిలిచే చిరస్మరణీయాలు!

పొంగడంలోనూ ఉంది ఒక పరమార్థం —

పొంగేది మంచికైతే జీవితమే సార్థకం!

హద్దులు దాటిన పొంగులు తెచ్చు ప్రమాదం —

మితిమీరని పొంగులే మనిషికి సౌభాగ్యం!

గుండ్లపల్లి రాజేంద్రప్రసాద్, భాగ్యనగరం.