అనునిత్యం కలం కదలాల్సిందే!

ఏదో ఒకటి చేయాలి — ఏదో ఒకటి రాయాలి!

ఏదో ఒకటి పంపాలి — ఏదో ఒకటి ప్రచురించాలి!

ఏదో ఒకటి చదివించాలి — అక్షరాలతో జీవించాలి!

ఏదో ఒకటి పాడాలి — ఏదో ఒకటి వినిపించాలి!

ఉదయాన్నే లేవగానే ఊహలకు పదును పెట్టాలి —

ఉత్సాహంగా కొత్త భావాలకు ఊపిరి పోయాలి!

కలం పట్టి కాగితంపై కవితను కురిపించాలి —

కమ్మని కవితా కుసుమాలను లోకానికి పంచాలి!

పత్రికల పుటలను పసండైనకవితలతో నింపాలి —

పాఠకుల హృదయాలలో స్థానాన్ని సంపాదించాలి!

సభలలో కవితలను సగర్వంగా వినిపించాలి —

సహృదయుల చప్పట్లతో సంతోషాన్ని పొందాలి!

నిన్నటి కవితకు నేడు కొత్త మెరుగులు దిద్దాలి —

నేటి కవిత రేపటికి కొత్తదనం సంతరించుకోవాలి!

రాయని భావాలు ఎన్నో రమ్మని పిలవాలి —

రాసిన అక్షరాలు మరిన్ని రాయమని వెంటాడాలి!

లేకపోతే పాఠకులు ఊరుకోరు — పలకరింపులు ఆగవు!

పత్రికల ఫోన్లు మోగుతూనే ఉంటాయి — పిలుపులు తగ్గవు!

అక్షరాలు వెంటబడతాయి — ఆలోచనలు నిదురపోవు!

కవితలు రాయకుంటే మనసు కుదుటపడదు — కలం విశ్రమించదు!

పాటలు పాడాలి — పరవశించి వినిపించాలి!

పదిమందితో చదివించాలి — పాఠకులను ఆకట్టుకోవాలి!

రచనలు పంపాలి — రసజ్ఞుల మన్ననలు పొందాలి!

సృజనకు సరికొత్త సొబగులద్దాలి — సాహిత్యాన్ని పండించాలి!

బతికినంత కాలం భావాలను పలికించాలి —

బాధలలోనూ అక్షరాలనే బాసటగా చేసుకోవాలి!

కాలం గడిచినా కలం కదులుతూనే ఉండాలి —

కడశ్వాస వరకు కవితా సేద్యం సాగుతూనే ఉండాలి!

గుండ్లపల్లి రాజేంద్రప్రసాద్, భాగ్యనగరం.