ఇంకేమి చేయాలో చెప్పవా!
రాగాలు తీయనా — రాగమాలికలు పాడనా!
గంధం పూయనా — గుబాళింపులు నింపనా!
పువ్వులు విసరనా — పూలబాటలు వేయనా!
నవ్వులు చిందనా — నవరసాలు పండించనా!
అత్తరు చల్లనా — అందాలను చూపించనా!
ముత్యాల హారాలు తేనా — ముచ్చటగా అలంకరించనా!
మోములు వెలిగించనా — మురిపాలు పలికించనా!
ఆనందాలు పంచనా — ఆత్మీయతను పెంచనా!
వెన్నెలను దించనా — వన్నెల విందు చేయనా!
విరజాజులు కోసుకురానా — విరుల జడలో తురుమనా!
తేనెలను కురిపించనా — తీయని ఊసులు పలుకనా!
చందమామను పిలవనా — చల్లని కబురులు చెప్పనా!
మల్లెలను కోయనా — మాలలుగా అల్లనా!
మధురిమలు నింపనా — మనసులను గెలుచుకోనా!
సిరిమువ్వలు మోగించనా — సింగారాలు చేయనా!
సిరులన్నీ కురిపించనా — చిరునవ్వులు పూయించనా!
హృదయాన్ని తెరవనా — ఎదలోని ప్రేమను చాటనా!
మనసున మనసును కలిపి — మమతల దీపాలు వెలిగించనా!
మధురమైన ఈ అనుబంధానికి — మంగళహారతి పట్టనా!
ఇంకేమి చేయాలో చెప్పవా — ఇంతకన్నా ఏం కావాలో చెప్పవా!
గుండ్లపల్లి రాజేంద్రప్రసాద్, భాగ్యనగరం.
Comments
Post a Comment