సమాజమే ఒక దేవాలయం!
సమాజమే ఒక దేవాలయం — సమష్టి జీవన సౌధం!
సమాజ హితమే పరమావధి — సత్కార్యాలే సాధనం!
సమాజ అభివృద్ధే కీలకం — సమైక్యతే ఆలంబనం!
సమాజ సేవే అభిలషణీయం — మానవత్వమే ఆభరణం!
మనుషులంతా ఒక్కటైతే — మహిలోనే స్వర్గసీమ!
మనసులన్నీ కలిసికట్టుగా సాగితే — మమతలే చిరునామా!
కులమతాల గోడలన్నీ కూలిపోవాలి — కలసిమెలసి సాగాలి!
కలతలన్నీ తొలగిపోవాలి — కరుణామృతం కురవాలి!
పేదల కన్నీరు తుడవాలి — వారి పెదవులపై నవ్వులు పూయించాలి!
బడుగు బలహీనులను చేరదీయాలి — అండగా నిలవాలి!
ఆకలితో అలమటించేవారికి అన్నదానం చేయాలి!
ఆపదలో ఉన్నవారికి ఆపన్నహస్తం అందించాలి!
విద్యావెలుగులు పంచాలి — విజ్ఞాన దీపాలు వెలిగించాలి!
వైద్యసేవలు అందించాలి — వేదనలను దూరం చేయాలి!
పర్యావరణాన్ని కాపాడాలి — పచ్చదనాన్ని పెంచాలి!
ప్రకృతి సంపదను పదిలపరచాలి — భావితరాలకు అందించాలి!
స్వార్థచింతన వీడాలి — సమష్టి తత్వం అలవడాలి!
అధికార దర్పం తగ్గాలి — అహంకారమంతా తొలగాలి!
అవినీతి అక్రమాలు అంతమవ్వాలి — న్యాయధర్మాలు నిలవాలి!
అనురాగ ఆత్మీయతలు వెల్లివిరియాలి — ఆదర్శ సమాజం ఆవిష్కృతం కావాలి!
సేవలోనే సంతృప్తి చూడాలి — త్యాగంలోనే ఆనందం పొందాలి!
తోటివారి ఉన్నతికి తోడ్పడాలి — తోడబుట్టినవారిలా మెలగాలి!
మనకోసం మనం జీవించడం కాదు — పదిమందికి ఉపయోగపడాలి!
మానవ జన్మకు సార్థకత చేకూర్చి — మానవత్వానికి మకుటం పెట్టాలి!
గుడి గోపురాలు కట్టడమే కాదు — గుండెల్లో గుళ్లను నిర్మించాలి!
దైవానికి పూజలు చేయడమే కాదు — దీనులకు సేవలు చేయాలి!
సమాజమే మన కుటుంబం — సమష్టి శ్రేయస్సే మన ధ్యేయం!
సమాజ సేవే మన సౌభాగ్యం — సమసమాజ స్థాపనే మన సంకల్పం కావాలి!
సమాజం బాగుంటేనే — మన బతుకులు బాగుంటాయి!
సమాజం ఎదిగితేనే — మన ఎదుగుదల సాగుతుంది!
స్వార్థాన్ని వీడి సమష్టి కోసం — ప్రతి మనిషి జీవించాలి!
సమాజ శ్రేయస్సు కోసమే — జీవితాన్ని అంకితం చేయాలి!
గుండ్లపల్లి రాజేంద్రప్రసాద్, భాగ్యనగరం.
Comments
Post a Comment