అక్షర సంకేతాలు!
చూపులు ఎన్నో భావాలకు సంకేతాలు —
చెప్పలేని మనసులోని మాటలకు ప్రతిరూపాలు!
ముఖకవళికలు అంతరంగపు సంకేతాలు —
మనిషి మనస్తత్వాన్ని తెలిపే ఛాయాచిత్రాలు!
చేతులు చేసే సైగలు సంకేతాలు —
చెప్పకుండానే చేరవేసే సందేశాలు!
కనులు పలికించే భాషకు అర్థాలెన్నో —
కనిపించని అనుబంధాలకు అవే వారధులు!
చిరునవ్వు సంతోషానికి సంకేతమైతే —
కన్నీటిచుక్క గుండెలోని గాయానికి సంకేతమే!
చెమటచుక్కలు శ్రమకు సంకేతాలు —
కష్టించే మనిషి విజయానికి తొలిమెట్లు!
ప్రకృతి అందించే సంకేతాలు ఎన్నెన్నో —
ప్రతి మార్పులో దాగివుంటాయి సూచనలు!
మేఘాల కదలికలు వానకు సంకేతాలు —
పక్షుల కిలకిలలు ప్రకృతి మేల్కొలుపులు!
పాఠకుల స్పందనలు కవులకు సంకేతాలు —
కవితా సృజనకు ప్రోత్సాహపు సందేశాలు!
చదివినవారి ప్రశంసలు పెంచే ఉత్సాహం —
మరిన్ని రచనలకు కలిగించే ప్రేరణం!
మౌనం కూడా ఒక్కోసారి సంకేతమే —
మాటలకందని భావాలకు అదొక భాషే!
కరచాలనం స్నేహానికి సంకేతమైతే —
ఆలింగనం ఆత్మీయతకు ప్రతిరూపమే!
కవితలు కవుల ప్రతిభకు సంకేతాలు —
కవి హృదయాంతరంగ భావాల అక్షరరూపాలు!
కలం నుంచి జాలువారే ప్రతి అక్షరం —
కవుల ఆలోచనలకు సజీవ సంతకాలు!
సంకేతాలను సరిగ్గా అర్థం చేసుకోవాలి —
సందర్భానుసారంగా స్పందించడం నేర్చుకోవాలి!
సూక్ష్మంగా గమనించే చూపుండాలి —
సూచనల వెనుక సత్యాన్ని గ్రహించాలి!
గుండ్లపల్లి రాజేంద్ర ప్రసాద్, భాగ్యనగరం.

Comments
Post a Comment