మనుషుల తీరుతెన్నులు!

ఎదుటివారి మనసులను

నొప్పించి తిట్టేవాళ్ళని దూరం పెట్టాలి —

ఎన్నో ఆశలతో

ఈ లోకంలో పుట్టేవాళ్ళని ఆహ్వానించాలి!

అధికార మదంతో

అమాయకులను కొట్టేవాళ్ళని బహిష్కరించాలి —

అవకాశం చూసుకొని

అందినకాడికి దోచుకునేవాళ్ళని దారికి తేవాలి!

కన్నవారి కోసం

కడుపు కట్టుకొని పెట్టేవాళ్ళని గౌరవించాలి —

కష్టాల కడలిలో

కన్నీటిని తుడిచేవాళ్ళని గుర్తుంచుకోవాలి! 

పక్కవారి ప్రగతిని చూసి

అసూయతో గిట్టేవాళ్ళకు దూరంగా ఉండాలి —

పరోపకార బుద్ధితో

పదిమందికి తోడయ్యేవాళ్ళని వెన్నుతట్టి ప్రోత్సహించాలి!

పగలతో పగబట్టి

పంతాలు పట్టేవాళ్ళని మార్చాలి —

ప్రేమతో పరుల హృదయాలలో

మమతలు చాటేవాళ్ళని మెచ్చాలి!

ఎవరు పుట్టినా

ఒకనాడు గిట్టేవాళ్ళని తెలుసుకోవాలి —

తప్పులు చేసేవాళ్ళని

తప్పు తెలుసుకునేలా మార్చాలి! 

తిట్టేవారిని కాదు,

తలచుకునేలా బతికేవారిని తలకెత్తుకోవాలి —

కొట్టేవారిని కాదు,

కౌగిలించుకునే మనసున్నవారిని గుండెల్లో నిలుపుకోవాలి!

పుట్టుకతో

ఎవరూ గొప్పవారు కాలేరని గ్రహించాలి —

ప్రవర్తనతోనే

మనుషులు మహనీయులవుతారని చాటిచెప్పాలి!

గుండ్లపల్లి రాజేంద్రప్రసాద్, భాగ్యనగరం.