అక్షరకుసుమాలు అక్షరాలు అందంగున్నాయి ఆనందాలను అందిస్తున్నాయి అక్షరాలు పువ్వుల్లా వికసిస్తున్నాయి నవ్వులను మోములపై వెదజల్లుతున్నాయి అక్షరాల్లో తేనె దాగున్నది నోటిని ఊరిస్తున్నది అక్షరాలపై సీతాకోకలు ఎగురుతున్నాయి మాధుర్యాన్ని మెల్లగా క్రోలుతున్నాయి అక్షరాలు తేనెచుక్కల్ని చల్లుతున్నాయి మనసుని మురిపించి మెరిపిస్తున్నాయి అక్షరాలు ముత్యాలు చల్లుతున్నాయి సేకరించి హారాన్ని గుచ్చమంటున్నాయి అక్షరాలు గుండెను తడుతున్నాయి భావాలను నెమ్మదిగా క్రక్కమంటున్నాయి అక్షరాలు ఆటలాడిస్తున్నాయి స్వరాలను పాటలై పాడిస్తున్నాయి అక్షరాలు అమృతాన్ని చిందిస్తున్నాయి పెదాలను తృప్తిగా తడిపేస్తున్నాయి అక్షరాలు మదుల్లో దూరుతున్నాయి హృదులను కరిగిస్తున్నాయి, మత్తెక్కిస్తున్నాయి అక్షరాలు నాటమంటున్నాయి కవితాసేద్యము కొనసాగించమంటున్నాయి అక్షరాలు వెంటపడుతున్నాయి కవితాసౌరభాలు వ్యాపించమంటున్నాయి -- గుండ్లపల్లి రాజేంద్రప్రసాద్, భాగ్యనగరం
Posts
కొఱతల చిట్టా రవి లేకపోతే భూగోళానికి వెలితి శశి లేకపోతే గగనానికి వెలితి అందం లేకపోతే దేహానికి వెలితి ఆనందం లేకపోతే వదనానికి వెలితి మాటలు లేకపోతే నోటికి వెలితి కూడు లేకపోతే కడుపుకు వెలితి భార్య లేకపోతే భర్తకు వెలితి మొగుడు లేకపోతే పెళ్ళానికి వెలితి ప్రేమ లేకపోతే హృదులకు వెలితి డబ్బు లేకపోతే మనుజులకు వెలితి అంగం లేకపోతే శరీరానికి వెలితి వెలుగు లేకపోతే జీవితానికి వెలితి హారం లేకపోతే మెడకు వెలితి కేశాలు లేకపోతే తలలకు వెలితి కంకణాలు లేకపోతే చేతులకు వెలితి కదలికలు లేకపోతే కాళ్ళకి వెలితి బొట్టు లేకపోతే నుదురుకు వెలితి బట్టలు లేకపోతే మనుజులకు వెలితి వెలితిలేని బ్రతుకే జీవనలక్ష్యం కావాలి గలితీలేని పనులే జనులకార్యం కావాలి గుండ్లపల్లి రాజేంద్రప్రసాద్, భాగ్యనగరం
చక్కని సాహితీ వేదిక ఈ చక్కని వేదికపైన ఆసీనులైన అతిధులెందరో ఈ చల్లని సమయాన హాజరైన కవివర్యులెందరో శ్రమకోర్చి ఏర్పాట్లుచేసిన సభా నిర్వాహకులెందరో శ్రద్ధపెట్టి పాల్గొంటున్న సాహితీ ప్రియులెందరో ||ఈ|| తమ అద్భుత ప్రసంగాలతో ఆకట్టుకున్న మహనీయులెందరో తమ తీయని కవితాగానాలతో అలరించే కవికంఠాలెన్నో విభిన్న కవితాతీరులతో కట్టిపడవేసే గొంతుకలెన్నో వివిధ భావావేశాలతో ||ఈ|| భ్రమలుకొలిపే కల్పనలెన్నో సరళమైన పదప్రయోగాలతో శ్రోతలను మెప్పించేమహాశయులెందరో పలులోతైన ఆలోచనలతో పులకరింపజేసే ప్రావీణ్యులెందరో ప్రాసలయల ప్రవాహంతో పరవశపరచే ప్రముఖులెందరో మెరిసే మాటలముగింపులతో మైమరపించే మహాత్ములెందరో ||ఈ|| వందనాలు వందనాలు పెద్దవాళ్ళకి వందనాలు దీవెనలు దీవెనలు చన్నవార్లకు దీవెనలు ప్రణామాలు ప్రణామాలు ప్రావీణ్యులకు ప్రణామాలు ధన్యవాదాలు ధన్యవాదాలు ప్రోత్సాహకులకు ధన్యవాదాలు ||ఈ|| గుండ్లపల్లి రాజేంద్రప్రసాద్,భాగ...
ఓ మంచిమనిషీ! జీవితాన్ని తెలుసుకో పుట్టుకని తరించుకో కాలాన్ని గౌరవించుకో కష్టాలని భరించుకో ప్రాణాన్ని పులకరించుకో మానాన్ని కాపాడుకో మదులని దోచుకో హృదులని పట్టుకో భాగ్యాల్ని కూర్చుకో భోగాల్ని ప్రాప్తించుకో ప్రేమల్ని పంచుకో బాంధవ్యాలని పెంచుకో దేవుడిని తలచుకో పూజలుని చేసుకో వరాలని కోరుకో కోర్కెలని తీర్చుకో సుకర్మలని చేసుకో సత్కీర్తిని అందుకో మానవతని చాటుకో మనిషినని నిరూపించుకో గుండ్లపల్లి రాజేంద్రప్రసాద్, భాగ్యనగరం
ఈ లోకంలో..... చిరునవ్వులు చిందిస్తున్న చిద్విలాసులు ఎందరో వెలుగులు వెదజల్లుతున్న వికాసవదనులు ఎందరో ||చిరు|| తేనెపలుకులు చల్లుతున్న తెలివైనవారు ఎందరో అమృతజల్లులు కురిపిస్తున్న అనుభవఙ్ఞులు ఎందరో అందాలు చూపుతున్న అపురూపులు ఎందరో ఆనందాలు పంచుతున్న అత్మీయులు ఎందరో ||చిరు|| సుగుణాలు నేర్పుతున్న సద్గురువులు ఎందరో సత్కర్మలు చేయిస్తున్న సుశీలులు ఎందరో సద్బాటను నడిపిస్తున్న సౌమ్యులు ఎందరో సమస్యలు తొలగిస్తున్న శుభకరులు ఎందరో ||చిరు|| సలహాలు అందిస్తున్న స్నేహితులు ఎందరో సత్కారాలు చేస్తున్న సుజనులు ఎందరో మెప్పులు గుప్పిస్తున్న మేధావులు ఎందరో గొప్పలు వ్యాపిస్తున్న ఘనులు ఎందరో ||చిరు|| వందనాలు వందనాలు పెద్దలకు వందనాలు దీవెనలు దీవెనలు చిన్నవారికి దీవెనలు ధన్యవాదాలు ధన్యవాదాలు ప్రోత్సాహకులకు ధన్యవాదాలు ప్రణామాలు ప్రణామాలు ప్రముఖపండితులకు ప్రణామాలు ||చిరు|| గుండ్లపల్లి రాజేంద్రప్రసాద్, భాగ్యనగరం ...
కవితా! తేనె చుక్కలా రా, తేట పలుకులా రా. చక్కని చిలుకలా రా, తెల్లని తేజములా రా. పూల దండలా రా, వెండి మేఘంలా రా. నీటి ప్రవాహంలా రా, నోటి నినాదంలా రా. కడలి కెరటంలా రా, గాలి తరంగంలా రా. ఆకాశ తారకల్లా రా, ధరణి రత్నాల్లా రా. అందాల ఆభరణంలా రా, ఆనందాల అద్దాలసౌధంలా రా. అమ్మ అనురాగంలా రా, అయ్య అభిమానంలా రా. ఆటల బొమ్మలా రా, పాటల సొత్తులా రా. పాల పొంగులా రా, పదాల హంగులా రా. వయ్యారి వధువులా రా, తెల్లారి వెలుగులా రా. మేటి మల్లియలా రా, నిత్య నూతనంలా రా. చెక్కిలి చిరునవ్వులా రా, చల్లని చిరుజల్లులా రా. చిన్నారి ముద్దుపలుకులా రా, పసివాడి పసిడికాంతిలా రా. మాటల మంత్రంలా రా, చేతల చైతన్యంలా రా. చెక్కిన శిల్పంలా రా, గీచిన చిత్రంలా రా. అక్షరాల ఆశలా రా, మానసిక జ్యోతిలా రా. పదాల సొంపులా రా, వీనుల విందులా రా. అమృత ధారలా రా, సుమాల సౌరభంలా రా. నిలిచిపోయే నాదంలా రా, నిత్యముండే కవిత్వంలా రా. -- గుండ్లపల్లి రాజేంద్రప్రసాద్, భాగ్యనగరం
కొత్తకవి కొంగొత్తప్రకంపనలు కొత్తగావచ్చావా సాహిత్యలోకం, వెంటతెచ్చుకున్నావా కమ్మనికవిత్వం. కళ్ళారాకాంచావా ఊహలజగం, తెలుసుకున్నావా ఆశలప్రపంచం. వెలిగిస్తున్నావా అక్షరజ్యోతులు, పారిస్తున్నావా పదాలప్రవాహాలు. పూయిస్తున్నావా పలుపుష్పాలు, చల్లుతున్నావా సుమసౌరభాలు. వడ్డిస్తున్నావా విందుభోజనం, అందిస్తున్నావా అధరామృతం. చూపుతున్నావా చిత్రశిల్పాలు, చేరుస్తున్నావా శాంతిసుఖాలు. చిందిస్తున్నావా చిరునవ్వులు, ప్రసరిస్తున్నావా ప్రత్యూషప్రభలు. మురిపిస్తున్నావా మట్టిమదులు, కరిగిస్తున్నావా కఠినహృదులు. ఆడిస్తున్నావా కవనక్రీడలు, పాడిస్తున్నావా గాంధర్వగానాలు. తెలుపుతున్నావా దానధర్మాలు, చూపుతున్నావా మనోమర్మాలు. కురిపిస్తున్నావా కంజపుధారలు, క్రోలిస్తున్నావా కావ్యరసాలు. సృష్టిస్తున్నావా సాహితీప్రకంపనలు, క్రమ్మిస్తున్నావా కబ్బపురాణితరంగాలు. -- గుండ్లపల్లి రాజేంద్రప్రసాద్, భాగ్యనగరం
అక్షరవెలుగులు అక్షరాలు వెలిగించాలని, అనునిత్యము ఆరాటపడుతున్నా. దీపాలు వెలిగించాలని, తిమిరాన్నితోలాలని పోరాటంచేస్తున్నా. కళ్ళను వెలిగించాలని, కమ్మనిదృశ్యాలు కనబరస్తున్నా. మోములు వెలిగించాలని, చిరునవ్వులు చిందిస్తున్నా. లోకమును వెలిగించాలని, రవినై కిరణాలుచిమ్ముతున్నా. రాత్రులను వెలిగించాలని, శశినై వెన్నెలనుచల్లుతున్నా. నక్షత్రపధము వెలిగించాలని, తారకలను తళతళలాడిస్తున్నా. కొవ్వొత్తులు వెలిగించాలని, కటికచీకట్లను తరమలానియత్నిస్తున్నా. జీవితాలు వెలిగించాలని, సమాజానికి హితోపదేశాలుచేస్తున్నా. మదులు వెలిగించాలని, మధురకవితలను మంచిగాకూర్చుతున్నా. బాణసంచా వెలిగిస్తున్నా, మ్రోగిస్తున్నా లక్ష్మీప్రసన్నంకోసం. కవితలను వెలిగిస్తున్నా, చదివిస్తున్నా వాగ్దేవికటాక్షంకోసం. -- గుండ్లపల్లి రాజేంద్రప్రసాద్, భాగ్యనగరం
ఓరి తుంటరోడా! ఓరి తుంటరోడా! లొంగుతామనుకున్నావా! మాయమాటలతో నొక్కివేయాలనుకున్నావా! సుంకాల శృంఖాలతో తలవంచుతామనుకున్నావా! స్వేచ్చావాయువులను విడిచి సంధికొస్తామనుకున్నావా! బెదిరింపుల తూటాలకు బెంబేలెత్తుతామనుకున్నావా! దొంగమాటల మాయకు దాసోహమంటామనుకున్నావా! కారుకూతల నాటకాలకు కంపించిపోతామనుకున్నావా! కుళ్ళు రాజకీయాలముందు కూలిపోతామనుకున్నావా! ఉగ్రవాదుల చెడుమార్గాలను ఉపేక్షిస్తామనుకున్నావా! మతోన్మాద చర్యలను ముట్టుకోలేమనుకున్నావా! ఆంక్షల అల్లకల్లోలంలో అల్లాడిపోతామనుకున్నావా! అహంకారపు అగ్నికి అణిగిమణుగుతామనుకున్నావా! మాదేశమే మా దీపం, స్వాతంత్ర్యమే మా ప్రాణం, ప్రజాశ్రేయస్సే మా ధ్యేయం— అదియే మా మార్గదర్శనం. మా నాయకుల నేతృత్వం మాకు దిక్సూచి, ధైర్యం; వారిని మేము గౌరవిస్తాం గర్వంగా బలపరుస్తాం. — గుండ్లపల్లి రాజేంద్రప్రసాద్, భాగ్యనగరం
కడుపే కైలాసం కడుపు వస్తే అమ్మానాన్నల అదృష్టం కడుపు పండితే కుటుంబానికి సంతోషం కడుపు ఎండితే కాయానికి కష్టం కడుపు మండితే క్రక్కుతుంది కోపం కడుపు కొడితే తగులునులే పాపం కడుపు నింపితే వచ్చునులే పుణ్యం కడుపు చించుకుంటే కాళ్ళమీద కంపడం కడుపు కొట్టుకుంటే కలుగునులే విషాదం కడుపు పారితే వంటికి దుఃఖం కడుపు అరగగపోతే దేహానికి అరిష్టం కడుపు నిమిరితే చిగురిస్తుంది ఆనందం కడుపు తిప్పితే శరీరానికి వ్యాయామం కడుపు చేస్తే శక్తికి నిదర్శనం కడుపు తంతే మానవతకే కళంకం కడుపు బానెడయితే రోగాలకు మూలం కడుపు కట్టుకుంటే శోషకు ఆహ్వానం కడుపు కూటికే కోటివిద్యలు నేర్వటం కడుపు ప్రీతికే కష్టాలను భరించటం కడుపే కైలాసం ఇల్లే వైకుంఠం కడుపే సర్వం పోషణే ధర్మం గుండ్లపల్లి రాజేంద్రప్రసాద్, భాగ్యనగరం
కవితాకవ్వింపులు - కవిత్వరూపాలు కవిత్వం కళ్ళకుకనిపించాలి పెదాలపలికించాలి వీనులకువినిపించాలి హృదులనుకట్టిపడేయాలి కవిత్వం తలల్లోమొలకెత్తాలి ఆకాశంవైపెదగాలి పలుపువ్వులపూయాలి పెక్కుఫలములనివ్వాలి కవిత్వం రుచిగావండాలి శుచిగావడ్డించాలి వడిగాతినిపించాలి తిన్నగాతృప్తిపరచాలి కవిత్వం సుమధురంగుండాలి సుగంధాలుచల్లాలి వెన్నెలనుచిందాలి వెలుగులుచిమ్మాలి కవిత్వం నిండుగుండాలి నాణ్యముగుండాలి నిత్యమైనిలిచిపోవాలి నవ్యమైనోర్లలోనానాలి కవిత్వం ప్రాయంలాపరుగెత్తాలి పాలులాపొంగిపొర్లాలి నదిలాప్రవహించాలి మదులామురిపించాలి కవిత్వం ఆటలాడించాలి పాటలుపాడించాలి మారుమ్రోగిపోవాలి మయిమరిపించాలి కవిత్వం అందంగుండాలి ఆనందమివ్వాలి అంటుకొనిపోవాలి అంతరంగాలుతట్టాలి కవిత్వం రంగులహంగులుచూపాలి అద్భుతశిల్పాలుచెక్కాలి చక్కనిబొమ్మలుగీయాలి సుందరదృశ్యాలువర్ణించాలి కవిత్వం పువ్వులుపుయ్యాలి వికసించివెలగాలి తేనెచుక్కలనుచల్లాలి హృదులనుదోచుకోవాలి కవిత్వం అనుభూతులుచెప్పాలి ఆస్వాదింపజేయాలి సందేశాలనివ్వాలి సందేహాలుతీర్చాలి కవిత్వం వానజల్లులాకురవాలి వరదజలంలాపారాలి ఒడలనుమత్తెక్కించాలి వేడుకలలోతేలించాలి గుండ్లపల్లి రాజేంద్రప్రసాద్, భా...
చేతల్లో... చేతల్లో చేవ ఉండాలి అందరూ మెచ్చేలా ఉండాలి చేతల్లో సేవ ఉండాలి స్వార్ధాన్ని తగ్గించుకోవాలి చేతల్లో ప్రతిభ ఉండాలి నలుగురూ గుర్తించేలా ఉండాలి చేతల్లో పట్టుదల ఉండాలి అనుకున్నది సాధించేలా ఉండాలి చేతల్లో మంచితనం ఉండాలి సమాజానికి మేలుచేసేలా ఉండాలి చేతల్లో లక్ష్యం ఉండాలి విజయతీరాలు చేరుకొనేలా సాగాలి చేతల్లో నమ్మకం ఉండాలి మనసులోని సందేహాలు తొలగాలి చేతల్లో నిజాయితీ చూపాలి మాటలకు కట్టుబడి ఉండాలి చేతల్లో నవ్యత ఉండాలి భవితపై దృష్టి సారించాలి చేతల్లో క్రమశిక్షణ ఉండాలి జనబాహుళ్యంలో రాణింపు పొందాలి చేతల్లో నిబద్ధత ఉండాలి జనహృదయాల్లో దీపాలు వెలిగించాలి చేతల్లో సులక్షణాలు ఉండాలి జీవితాన్ని సార్ధకం చేసుకోవాలి గుండ్లపల్లి రాజేంద్రప్రసాద్, భాగ్యనగరం
ఓ అక్షరాభిమాని! అక్షరాలను అరవిందాల్లా ఆవిష్కరించు మనసులను మురిపించు అక్షరాలను తేనెచుక్కలుగా చేయి నాల్కలకు చేర్పించు అక్షరాలను అమృతంగా పొంగించు అధరాలకు అందించు అక్షరాలను అందంగా కూర్చు ఆనందాలు పంచిపెట్టు అక్షరాలను గీతాలుగా అల్లు శ్రావ్యంగా పాడించు అక్షరాలను విత్తనాలుగా నాటు వటవృక్షాలుగా ఎదిగించు అక్షరాలను అర్ధవంతంగా ప్రయోగించు అంతరంగాలను ఆకర్షించు అక్షరాలను అవనిపై కురిపించు జీవనదిలా పారించు అక్షరాలను పంచభక్ష్యాలుగా తయారుచెయ్యి కడుపులునింపి కుతూహలపరచు అక్షరాలను నవరసాలుగా మార్చెయ్యి మనసులను మత్తెక్కించు అక్షరాలను కిరణాలుగా విసురు అఙ్ఞానాంధకారలను పారద్రోలు అక్షరాలను అద్భుతంగా వాడు వాగ్దేవికి ప్రీతిపాత్రుడవుకమ్ము గుండ్లపల్లి రాజేంద్రప్రసాద్, భాగ్యనగరం
రాతల్లో సోకులు సున్నితంగా చూపుతా మదులు మెలమెల్లగా మీటుతా అక్షరాలు ఏరుకొని చల్లుతా అనుభవాలు కోరికోరి పంచుతా పదాలు పువ్వుల్లా కూరుస్తా పాఠకులకు పసందు కలిగిస్తా పలుకులు ప్రేమగా చిందుతా తేనెచుక్కలు తెమ్మరగా చల్లుతా రాతలు నిరంతరం సాగిస్తా రసాలు గటగటా త్రాగిస్తా పాఠాలు పదేపదే చెబుతా గమ్యాలు గబగబా చేరుస్తా పువ్వులు నిండుగా పూయిస్తా పరిమళాలు పరిసరాల్లో చిందిస్తా నవ్వులు మెండుగ కురిపిస్తా మోములు కళకళా వెలిగిస్తా ప్రాసలు పంక్తుల్లో పారిస్తా పోలికలు ఆకర్షణగా ప్రయోగిస్తా ఊహలు దండిగా ఊరిస్తా భావాలు ఘనంగా పారిస్తా కలము నిత్యమూ కదిలిస్తా పుటలు విరివిగా నింపేస్తా కళ్ళు పూర్తిగా తెరిపిస్తా నిజాలు నేరుగా ఎరిగిస్తా నీతులు టకటకా వల్లెవేస్తా బతుకులు బహుబాగా పండిస్తా హృదులు మెల్లగా కరిగిస్తా గుండెలు విధిగా మురిపిస్తా రచనల్లో రమ్యంగా నేనుంటా రసాల్లోనే నాయాత్ర సాగిస్తా కవితల్లో వెనుక నేనుంటా కమ్మదనాల్లో క్రమంగా ముంచేస్తా గుండ్లపల్లి రాజేంద్రప్రసాద్, భాగ్యనగరం
కవితా చప్పుళ్ళు కవిత కనపడినపుడు పత్రికను విసిరేయకు, పుస్తకాన్ని దాచేయకు, పఠనానందం విడువకు. కవిత చదివేటపుడు కవిహృదయాన్ని చూడు, కవికష్టాన్ని కను, కమ్మదనాన్ని క్రోలు. కవిత పొగిడేటపుడు ఆంతర్యాన్ని వెల్లడించు, మాధుర్యాన్ని పంచిపెట్టు, సుగంధాన్ని వెదజల్లు. కవిత వినేటపుడు శ్రద్ధను చూపించు, శ్రావ్యతను ఆస్వాదించు, సంతసాన్ని చిందించు. కవిత రాయాలనుకున్నప్పుడు కవులతీరులు పరిశీలించు, కొన్ని కవితలను పఠించు, కొత్త రీతిలో వెలిబుచ్చు. కవిత కూర్చేటపుడు విషయాన్ని విశదీకరించు, శిల్ప నైపుణ్యాన్ని ప్రదర్శించు, ప్రాసలు పోలికలు ఉపయోగించు. కవిత వెంటబడ్డపుడు కసరటము చేయకు, కలమును చేతపట్టు, కాగితమును పూరించు కవిత కుతూహలపరచినపుడు కూర్చటము కొనసాగించు, సృజనశక్తిని వినియోగించు, కవితాయుక్తిని ప్రయోగించు. కవిత కవ్వించినపుడు చెంతకు తోడుగా వెళ్ళు, చెలిమిని మెల్లగా సాగించు, చేతులను కలుపుకొని నడువు. కవిత కోరినపుడు తక్షణమే స్పందించు, హృదయాన్ని అర్పించు, కమ్మని కవనాన్ని అల్లు. -- గుండ్లపల్లి రజేంద్రప్రసాద్, భాగ్యనగరం
ఏమి చెయ్యను? వెలుగు చెంతకొస్తుంది చెలిమి చేస్తుంది చక్కదనాలు చూపుతుంది స్పందనలు తెలుపమంటుంది గాలి చుట్టుముడుతుంది తనువును తాకుతుంది గుండెను ఆడిస్తుంది లయబద్ధంగా వ్రాయమంటుంది పువ్వులు ప్రక్కకొస్తున్నాయి పరిమళం చల్లుతున్నాయి పరవశపరుస్తున్నాయి పెట్రేగిపొమ్మంటున్నాయి పలుకులు పరుగునవస్తున్నాయి పెదవులను ఆక్రమించుతున్నాయి తేనెచుక్కలను చిమ్మమంటున్నాయి సంతసాలను చేకూర్చమంటున్నాయి అక్షరాలు అందుబాటులోకొస్తున్నాయి పదాలపంక్తులుగా పేరుకుంటున్నాయి కమ్మనివాక్యాలుగా కూడుకుంటున్నాయి రసాత్మకమై రంజింపజేయమంటున్నాయి తలపులు తడుతున్నాయి విషయాలు వెలువడుతున్నాయి నవరసాలను నింపమంటున్నాయి సంతృప్తితో ముందుకుసాగమంటున్నాయి కలము చేతిలోదూరుతుంది గీతలను గీయమంటుంది గానాలను పారించమంటుంది గాంధర్వులను తలపించమంటుంది కాగితాలు దగ్గరకొస్తున్నాయి బల్లపై పరచుకుంటున్నాయి భావాలను ఎక్కించమంటున్నాయి భ్రమలను కొలుపమంటున్నాయి డృశ్యాలు కళ్ళముందుకొస్తున్నాయి శిల్పాలుగా చెక్కమంటున్నాయి చిత్రాలుగా గీయమంటున్నాయి మదులను మురిపించమంటున్నాయి సృష్టికర్తనని తలబోస్తున్నారు బొమ్మలు చేయమంటున్నారు ప్రాణాలు పొయ్యమంటున్నారు కమ్మదనాలు పంచమంటున్నారు గ...
అద్భుతంగా జరిగిన కాలిఫోర్నియా వీక్షణం 159వ అంతర్జాల సాహితీ సమావేశం ********************************************************** నేడు 15-11-25వ తేదీ ఉదయం 6-30 గంటలకు నిర్వాహకురాలు డాక్టర్ గీతామాధవి గారి స్వాగత వచనాలతో ప్రారంభమైనది. ముఖ్య అతిథి శ్రీ పారుపల్లి కోదండరామయ్య గారిని వేదికపైకి ఆహ్వానించి వారిని సభకు పరిచయం చేశారు. శ్రీ కోదండరామయ్యగారు తెలుగుభాషావ్యాప్టికై అనన్యమైన కృషి చేస్తున్నారని, వారు తెలుగు భాషను రక్షించుకోవడంపై అనేక పుస్తకాలు వ్రాసారు, అనేక వేదికలపై ప్రసంగించారని చెప్పారు. తెలుగుభాషను రక్షించుకోవాలంటే పాఠశాలవిద్య ప్రాథమిక స్థాయినుండి ఉన్నత స్థాయి సాంకేతిక విద్యవరకూ తెలుగు మాధ్యమంలోనే ఉండాలన్నారు. ముందుగా తలిదండ్రులు వారి పిల్లలకు తెలుగు భాషే నేర్పాలన్నారు. తెలుగు భాషలో మాట్లాడడం అవమానంగా భావించే దుస్థితి పోవాలన్నారు. జనంలో కదలిక రావాలని, ఉద్యమం చేయాలని చెప్పారు. వారి ప్రసంగం అందరినీ ఆకట్టుకుంది. వారి ప్రసంగంపై గీతా మాధవి గారు, గుండ్లపల్లి రాజేంద్రప్రసాద్ గారు స్పందించారు పిదప శ్రీ రాజేంద్ర ప్రసాద...
కవిత్వం అందమై అలరించాలి, ఆనందాలు పంచిపెట్టాలి. అతిమధురమై పొంగాలి, ఆస్వాదింపజేసేలా ఉండాలి. మేఘమై తేలిపోవాలి, అమృతజల్లులు చిందించాలి. సుతిమెత్తగా సాగిపోవాలి, స్పర్శలా హృదయాన్నితాకాలి. పువ్వై ప్రకాశించాలి, పొంకాలతో రంజింపచేయాలి. పరిమళమై వ్యాపించాలి, పరిసరాల్ని పులకరింపచేయాలి. నవ్వులై మురిపించాలి, మోములపై వెలుగులునింపాలి. పదాల్లో లయ ఉండాలి, వీనులకు విందు ఇవ్వాలి. పంక్తుల్లో పస పండాలి, మదుల్లో కాపురం పెట్టాలి. భావాల్లో లోతు ఉండాలి, హృదుల్లో నిత్యం నిలవాలి. జనాల చెంతకు చేరాలి, మనసులను మేలుకొలపాలి. చదువరులను అలరించాలి, గుండెల్లో గూడుకట్టించాలి. ఊహలకు రూపం అవ్వాలి, మాటలకు చిత్రం కావాలి. మదులకు అద్దం పట్టాలి, హృదులకు స్వరమై పలకాలి. — గుండ్లపల్లి రాజేంద్రప్రసాద్, భాగ్యనగరం
పాఠకా! ప్రేరకా! (కవి ముద్ర) కవితాశీర్షిక చూశావు నామాటేనని గుర్తుపట్టావు తొలివాక్యం చదివావు నారసాత్మకం అనుకున్నావు అక్షరాలను గమనించావు నాముత్యాలని గ్రహించావు పదాలను పఠించావు నాలాలిత్యమేనని ఎరిగావు అలొచనలను పట్టుకున్నావు నాతపనను చవిచూశావు భావాన్ని పసికట్టావు నావెన్నెలను ఆస్వాదించావు శైలిని కనుక్కున్నావు నాసృష్టేనని ఆకళించుకున్నావు తేటపదాలను గురుతుపట్టావు నాపలుకులేనని ఆదరించావు చిత్తాన్ని దోసుకుందనుకున్నావు నాపనేనని తెలుసుకున్నావు మనసును ముట్టిందనుకున్నావు నాముద్రేనని కనుక్కొన్నావు హృదిని మీటిందనుకున్నావు నానామాన్ని స్మరించుకున్నావు గుండెకు హత్తుకుందనుకున్నావు నారచనేనని యాదికితెచ్చుకున్నావు నిత్యం విడవక చదువుతున్నావు నన్ను ఆకాశానికి ఎత్తుతున్నావు రొజూ వ్యాఖ్యానం చేస్తున్నావు నాపై ప్రశంసలవర్షం కురిపిస్తున్నావు పాఠకోత్తములకు స్వాగతాంజలులు ప్రతిస్పందనలకు బహుధన్యవాదాలు ప్రోత్సాహానికి పలుప్రణామాలు పరిచయానికి కడుకృతఙ్ఞతలు గుండ్లపల్లి రాజేంద్రప్రసాద్,భాగ్యనగరం
ఓ కవీ! పువ్వులను పరికించు = పలకరించి పరవశపరుస్తాయి, ప్రోత్సహించి కలమునుపట్టిస్తాయి. చిరునవ్వులను తిలకించు - మోములపైకెక్కి వెలుగులు చిమ్ముతాయి, పుటలపైకెక్కి పులకరింపజేస్తాయి. సుగంధాల చెంతకు వెళ్ళు - గుప్పుగుప్పుమని కప్పేస్తాయి, రయ్యిరయ్యిమని రచనలుచేయిస్తాయి. ప్రేమను చిరుగాలిగా మార్చు - దూరమైనా దగ్గరకొచ్చి చుట్టేస్తాయి, హృదినిపట్టేసి ఆటలాడిస్తాయి. మాటలను గాలినిచేసి ఆకాశానికి పంపు - మేఘమై పైన చినుకులు కురిపిస్తాయి, అమృతమై మాధుర్యలను అధరాలకందిస్తాయి. వలపును అణచివెయ్యకు - రహస్యంగా ప్రక్కను జీవిస్తుంది, వెంటబడి వేధనలకు గురిచేస్తుంది. ఆలోచనలను అంతముచేయకు - అనుసరించి మహిమను చూపిస్తాయి, అంతరంగంలో శాశ్వతంగా నిలిచిపోతాయి. భావాలను తెంచివేయకు - చిగురించి మారాకు తొడుగుతాయి, ఫలించి లాభాలను అందిస్తాయి. మనసును మభ్యపరచి మూసేయకు - మౌనంగా పలుకులు వినిపిస్తుంది, రమ్యంగా రసాస్వాదన చేయిస్తుంది. కవితలను పఠించు ఆలకించు - చెవులను చేరి శ్రావ్యత కలిగిస్తాయి, గుండెలను చేరి ఘనతను చాటుతాయి. గుండ్లపల్లి రాజేంద్రప్రసాద్, భాగ్యనగరం
చూపుల స్రవంతి కంటి చూపే నిశ్శబ్ద మంత్రం, మనసుల తడిపే భావ తంత్రం. చక్కని చూపు చిందించు తేనియ, చూడగానే కదిలించు గుండెకాయ. టక్కరి చూపు దహించు ధగధగ, చెంపలను మెరిపించు మిళమిళ. సూటి చూపు గుచ్చు బాణాలు, నిశ్శబ్దంలో వినిపించు గాధాలు. పక్క చూపు పలుకులకంటే లోతు, మాటలకందని భావాలకు సరితంతు. చిలిపి చూపు చిరునవ్వుల దాచు, కొంటె చూపు హృదయాల్ని ఆచు. బెరుకు చూపు భ్రమల చాటునుండు, దొంగ చూపు కోరికల మాటునుండు. వంకర చూపు వ్యంగ్య గీతమౌ, మాటలకతీతమై మౌన శీతలమై. తొలి చూపే ప్రేమ పుట్టుకకు కారణం, ఆ చూపే హృదయానికి కొత్త సుగంధం. చూపులే లోకం, చూపులే భావం — వాటిలో దాగి ఉన్నదే జీవన రాగం. గుండ్లపల్లి రాజేంద్రప్రసాద్, భాగ్యనగరం
చూపుల బండారం కంటి చూపుల్లో తేడాలుంటాయి అర్ధాలుంటాయి భావాలుంటాయి చక్కని చూపుల్లో అందముంటుంది ఆకర్షణవుంటుంది ఆనందముంటుంది టక్కరి చూపుల్లో ఆంతర్యముంటుంది మాయవుంటుంది మర్మముంటుంది సూటి చూపుల్లో ప్రశ్నవుంటుంది పరిశీలనుంటుంది ప్రతిస్పందనుంటుంది పక్క చూపుల్లో వెదుకులాటుంటుంది వెంపర్లాడటముంటుంది వివిధమార్గాన్వేషణవుంటుంది చిలిపి చూపుల్లో రెచ్చకొట్టటముంటుంది రమణీయతుంటుంది రహస్యముంటుంది కొంటె చూపుల్లో కోరికవుంటుంది కుతూహలముంటుంది కమ్మదనముంటుంది బెరుకు చూపుల్లో బోల్తాకొట్టించాలనుంటుంది బుట్టలోవేసుకోవాలనుంటుంది బురిడీచేయాలనుంటుంది దొంగ చూపుల్లో దాపరికముంటుంది దోచుకోవాలనుంటుంది దుర్బుద్ధివుంటుంది వంకర చూపుల్లో వక్రబుద్ధివుంటుంది వెన్నుపోటుదాగుంటుంది వికృతమార్గముంటుంది తొలి చూపుల్లో తత్తరపాటుంటూంది తొందరపాటుంటూంది మొహమాటముంటుంది కొన్ని చూపుల్లో మాధుర్యాలుంటాయి మాటలుంటాయి మహత్యాలుంటాయి విసిరిన చూపులు చెబుతాయి స్వాగతం సాగిస్తాయి సంభాషణం చేకూరుస్తాయి సంతోషం కలిసిన చూపులు సాగిస్తాయి స్నేహాలు అందిస్తాయి శుభాలు చేకూరుస్తాయి సుఖాలు విసిరిన చూపులకు చిక్కకండి పన్నిన వలలకు దొరకకండి చూపులతో నాట...
చూపుల సింగారాలు చూపులలో చక్కదనముంటుంది - చూపరులను కట్టిపడవేస్తుంది, కాంతులను విరజిమ్ముతుంది హృదులను సంతసపరుస్తుంది. చూపులలో మాటలుంటాయి — చెప్పకుండానే పలుకుతాయి, గుండెలలో నిండిన భావాలన్నీ ఒక క్షణంలో వ్యక్తమవుతాయి. నిశ్శబ్దాన్ని చీల్చేచూపులు, నవ్వులకన్నా మధురమవుతాయి, పలకరింపు లేకపోయినా మనసులమధ్య సేతువులవుతాయి. ఓ చూపు — చిన్న గాలివానలా వస్తుంది, మనసులోని కణాలను తాకి వెలుగుల మేఘముగా మారుతుంది. ఓ చూపు — ముత్యపు బిందువై పడుతుంది, కళ్ళలోనుంచి గుండెలలోకి జారుతుంది, అమృతపు జలధారగా కురుస్తుంది. మాటలు తడబడినపుడు, చూపే భాషగామారుతుంది, సంగతులు తట్టనపుడు, చూపులే సందేశాలవుతాయి. ఒక్కోచూపు కోపంలో కాంతులా దహిస్తుంది, ప్రేమలో చల్లని వానలాగ తడుపుతుంది, విషాదంలో గాఢమవుతుంది, ఆనందంలో మెరుపులా మెరుస్తుంది. కంటిచూపులు కొన్నిసార్లు గాయపరుస్తాయి, కొన్నిసార్లు మాయమవుతాయి, కానీ ఒకసారి కలిసిన చూపులు — జీవితమంతా జ్ఞాపకాలవుతాయి. మొదట చూచిన చూపే కొత్త ప్రాణాన్నిస్తుంది, నవ్వుల వెనుక ఆ చూపులలోనే కథ మొదలవుతుంది. చూపులే సాక్షిగా ప్రేమ పుట్టకొస్తుందీ, మౌనమే జవాబుగా మాట మూగపోతుంది, కానీ ఆ చూపులలోనే జీవితం మొత్తం వెలి...
చెట్ల గాధలు చెట్లు — నాటినదీ చూశా, పెంచినదీ చూశా, కొట్టినదీ చూశా, కాల్చినదీ చూశా. చెట్లు — పూసి పరిమళించినవీ చూశా, పొంకాలు చూపి మురిపించినవీ చూశా, సౌరభాలు చల్లి సంతసపెట్టినవీ చూశా, ప్రకృతిని పరవశింపజేసినవీ చూశా. చెట్లు — కాయలతో తీపి పంచినవీ చూశా, జీవితాలను పోషించినవీ చూశా, తనువులను తృప్తిపరిచినవీ చూశా, భూమికి బలం అందించినవీ చూశా. చెట్లు — పలకరించి నీడనిచ్చినవీ చూశా, చెంతకు పిలిచి చల్లదనమిచ్చినవీ చూశా, చెలిమిగా నిలిచినవీ చూశా, మానవునికి మిత్రులైనవీ చూశా. చెట్లు — గాలిని ఆలింగనంచేసినవీ చూశా, పక్షులకు గూళ్ళైనవీ చూశా, పశువులకు మేతైనవీ చూశా, జీవులకు ఆధారమైనవీ చూశా. చెట్లు — మందులైనవీ చూశా, రోగాలను తగ్గించినవీ చూశా, దేవతలగా అయ్యినవీ చూశా, పూజలను స్వీకరించినవీ చూశా. చెట్లు — రాళ్లదెబ్బల తిన్నవీ చూశా, గొడ్డళ్లతో నరికినవీ చూశా, అరచి ఏడ్చినవీ చూశా, కూలి నేలకొరిగినవీ చూశా. చెట్లు — చిగురించీ పునర్జీవించినవీ చూశా, పచ్చదనమై పులకరించినవీ చూశా, వరదల్లో కాపాడినవీ చూశా, వేడిగాలిలో ఆశ్రయమిచ్చినవీ చూశా. చెట్లు — సావాసం నేర్పినవీ చూశా, సేవల చేయమన్నవీ చూశా, సమాజాన్ని వృద్ధిచేయమనినవీ చూశా, ...
సూక్తాష్టకం రెక్కాడితేగాని డొక్కాడదు- కడుపునిండదు నిదురపట్టదు. గాలాడితేగాని శ్వాసందదు - గుండెకొట్టుకోదు ప్రాణంనిలువదు. అనుభవిస్తేగాని అవగతంకాదు- విశ్వాసంకలగదు ఆనందందొరకదు. కళ్ళతోచూస్తేగాని నిజాలుతెలియవు- నమ్మబుద్ధిపుట్టదు రంగుబయటపడదు. సాధనచేస్తేగాని పనులుసమకూరవు - ఫలితాలుచిక్కవు ప్రతిభవెల్లడికాదు. మనసువిప్పితేగాని నిజాలుతెలియవు - అంతరంగంవెలువడదు విలువబహిర్గతంకాదు. అడుగులేస్తేగాని ముందుకుజరగము - పయనంసాగదు గమ్యముచేరము. కలంకదిలితేగాని కాగితంమాట్లాడదు - కవితాపుష్పంపూయదు భావరాగంవెలుగొందదు. గుండ్లపల్లి రాజేంద్రప్రసాద్, భాగ్యనగరం
నా విశ్రాంత జీవితగమనం వాడిపోబోయే నాకు వరాలెందుకు, వాగ్దానాలెందుకు విలాసాలెందుకు, విరమించకుండా వాగ్దేవినిపూజిస్తా, విషయాన్వేషణచేస్తా వాక్యాలనురసాత్మకంచేస్తా... పండిపోబోయే నాకు పరుగులెందుకు, పాటులెందుకు పాకులాటలెందుకు, పలుకులమ్మనితలుస్తా పదాలుపేరుస్తా, పెదాలువిప్పుతా పలుకులుచిమ్ముతా... రాలిపోబోయే నాకు రత్నాలరాశులెందుకు, రసాభసాలెందుకు రాగద్వేషాలెందుకు, రయ్యిరయ్యిమంటూ రచనలు సాగిస్తా, రమ్యతచేకూరుస్తా రసాస్వాదనచేయిస్తా... కూలిపోబోయే నాకు కారుకూతలెందుకు, కాసులవేటెందుకు కష్టపడటమెందుకు, కదలకుండామెదలకుండా కలంపడతా, కాగితాలునింపుతా కవితలుకూరుస్తా... నా విశ్రాంతజీవితం-ఆలోచనాత్మకం, అక్షరాలసేద్యం ఆవిష్కరణలపర్వం , అందాలమయం ఆనందాలభరితం, ఆసాంతం ఆప్యాయం అవిశ్రాంతం... గుండ్లపల్లి రాజేంద్రప్రసాద్,భాగ్యనగరం
🌺 తెలుగు వైభవం 🌺 తెలుగు — మందార మకరందం, మాతృమూర్తి నేర్పిన మధురనాదం. వాగ్ధేవి నోటిలో వెలసిన అజంతం, వెన్నెల ప్రసరించిన గానామృతం. కళల కలువ తోటలో తేనెతుట్టె, కవిత్వం కుసుమించె ప్రతి అక్షరమూ. త్యాగరాజు కీర్తనల్లో తారల కాంతి, గురజాడ వాడుకపదాల్లో జనరంజని. తెలుగు నేలపై పుట్టిన పండితులు, పదసముద్రం లోతులు కొలిచినవారు. శ్రీనాథుడి శ్లేషముల సీమలో ముత్యాలు, వేమన చెప్పిన ఆటవెలదులలో సూక్తులు. తెలుగు తల్లి ఒడిలో పుట్టినవారెవరైనా — అక్షరాల గర్వం, భాషా సౌభాగ్యం అనుభవిస్తారు. మనసు నిండా మమకారమై తేలే — అమృతభాషే, మన తెలుగుతల్లి భాష! తెలుగును - మన ప్రాంతంలో మెరిపించుదాం పర రాష్ట్రాలలో పలువురిచే పలికించుదాం వివిధ దేశాల్లో విరివిగా వ్యాపించుదాం తెలుగుతల్లి ఋణం తప్పకుండా తీర్చుకుందాం ✍ గుండ్లపల్లి రాజేంద్రప్రసాద్, భాగ్యనగరం ✍
అంతా నీ ఇష్టం చీకట్లో మగ్గుతావో, వెలుగుల్లో మెరుస్తావో — నీ ఇష్టం. ఓటమితో కృంగిపోతావో, గెలుపుకోసం కృషిచేస్తావో — నీ ఇష్టం. అజ్ఞానంలో కునారిల్లుతావో, విజ్ఞానంతో వర్ధిల్లుతావో — నీ ఇష్టం. పాపాలు మూటకట్టుకుంటావో, పుణ్యాలు ప్రాప్తించుకుంటావో — నీ ఇష్టం. పరువు పోగొట్టుకుంటావో, పేరు తెచ్చుకుంటావో — నీ ఇష్టం. గుడ్డిగా అనుసరిస్తావో, పారజూచి ప్రవర్తిస్తావో — నీ ఇష్టం. మనుజులను బాధపెడతావో, మనసులను దోచుకుంటావో — నీ ఇష్టం. పిచ్చిగా జీవితం గడుపుతావో, తెలివితో మనుగడ సాగిస్తావో — నీ ఇష్టం. అబద్ధాలు చెబుతావో, నిజాలు వెల్లడిస్తావో — నీ ఇష్టం. చేదును పంచుతావో, తీపిని తినిపిస్తావో — నీ ఇష్టం. ద్వేషము రగిలిస్తావో, ప్రేమను పంచుతావో — నీ ఇష్టం. చిగురించి పచ్చబడతావో, పండిపోయి రాలిపోతావో — నీ ఇష్టం. లేనివాటికి వెంపర్లాడుతావో, ఉన్నవాటితో ఆనందిస్తావో — నీ ఇష్టం. ఉత్తమాటలు చెబుతావో, గట్టి మార్గము ఎన్నుకుంటావో — నీ ఇష్టం. ముళ్ళబాటలో నడుస్తావో - పూలపథంలో పయనిస్తావో - నీ ఇష్టం. సొంతలాభము కోరుకుంటావో - సమాజశ్రేయస్సు ఆశిస్తావో - నీ ఇష్టం. నీ మనసే నీ అదృష్టం, నీ చేతలే నీ ఐశ్వర్యం - అంతా నీ ఇష్టం... కానీ- నీ...
🌅 సూర్యోదయం 🌅 చీకటిని చీల్చుకుంటూ చిరునవ్వుతో పైకి లేచే సూర్యుడు — నిద్ర మత్తును తొలగించి జగతిని జాగృతంచేస్తాడు. మేఘాల ముసుగులు తొలగి, ఆకాశం తామరపూవై తేలిపోతుంది, కాంతి చారలు వెదజల్లుతూ దిక్కులన్నీ మెరిసిపోయాయి. గాలులు మృదువుగా ఊదుతాయి, పక్షులు గీతాల్ని ఆలపిస్తాయి, పూలు తలలు ఊపుతాయి, ప్రకృతిని పులకరింపజేస్తాయి. నదులపై కిరణాలు నాట్యం చేస్తాయి, పొలాలపై బంగారు తెర పరుచుకుంటుంది, తల్లి భూమి చిరునవ్వుతో పిల్లలను మేల్కొలుపుతుంది. సముద్ర ఉపరితలంపై మొదటి కిరణం పడగానే — వేల సంవత్సరాల చరిత్రలాగే నిత్యజీవితం మళ్లీ మొదలవుతుంది. సూర్యోదయం — ఆశకు ప్రతీక, ఆరంభానికి సంకేతం, అంతరంగాలకు నూతనగీతం! ప్రతి ఉదయం చెబుతుంది — "లేచి రా! జీవితం ఎదురుచూస్తుంది" ఆ కిరణాల పిలుపులో ప్రేరణ, ప్రాణం, పరవశం కలిసిపోతాయి! ✍ గుండ్లపల్లి రాజేంద్రప్రసాద్, భాగ్యనగరం ✍
ఉత్ప్రేక్షలు ఆకాశం అంచులకు ఎత్తుతా - నక్షత్రాలు పెక్కుటిని ఏరిస్తా, పాతాళం లోతుల్లోకి దించుతా - నవరత్నాలు సేకరించి తెమ్మంటా. పలుకుల్లో తేనెను చిందిస్తా - అధరాల్లో సుధను పారిస్తా, మల్లెపూలు తలపై చల్లుతా - మత్తులోకి మనసుని నెట్టుతా. నవ్వులు గాలిలో విసురుతా - పువ్వులు బోలెడు పూయిస్తా, బొట్టులో చంద్రుని చూపుతా - ముక్కుతో కోటేరుని కనమంటా. కళ్ళతో సైగచేసి స్వాగతిస్తా - కరాలతో మృదువుగా స్పృశిస్తా, హంసను నడకతో తలపిస్తా - కోకిలను గానముతో గుర్తుకుతెస్తా. బుగ్గల్లో సిగ్గులు వెలువరిస్తా - మోములో కాంతులు విరజిమ్ముతా, చీరలో సింగారం చూపిస్తా - మేనులో శృంగారం ఒలికిస్తా. గాజులు గణగణమోగిస్తా - గుండెలు ఝల్లుమనిపిస్తా, గజ్జెలు ఘల్లుమనిపిస్తా - మనసులు పులకరింపచేస్తా. కలంతో వెలుగులు ప్రసరిస్తా - పుటలపై ముత్యాలు పేర్చుతా, ఉత్ప్రేక్షలతో హృదుల అలరిస్తా - ఉపమానాలతో మదుల మురిపిస్తా. గుండ్లపల్లి రాజేంద్రప్రసాద్, భాగ్యనగరం
ఆసాంతం అద్భుతంగా జరిగిన కాప్రా మల్కాజగిరి కవుల వేదిక అంతర్జాల సమావేశం ********************************************* నిన్న సాయంత్రం అంతర్జాలంలో కాప్రా మల్కాజగిరి కవుల వేదిక 13వ సమావేశం ఆసాంతం అద్భుతంగా జరిగింది. ముఖ్య అతిధిగా పాల్గొన్న అంతర్జాతీయ తెలుగు కవి డాక్టర్ పెరుగు రామక్రిష్ణ గారు వచన కవిత్వ నిర్మాణ పద్ధతుల గురించి ఒక అరగంట సేపు చక్కని ప్రసంగం చేశారు. కుందుర్తి ఆంజనేయులు, శ్రీశ్రీ, శేషేంద్ర శర్మ మొదలగు కవుల కవితలను ఉదహరించారు. వచన కవితల ప్రాధమిక లక్షణాలైన స్వేచ్ఛాయుత నిర్మాణము, భావ ప్రవాహ ఆధారిత నిర్మాణము, దృశ్యమాన చిత్రాలతో ప్రదర్శనము, సామాజిక స్పృహ మరియు భాషా సరళత గమ్యము గురించి సోదాహరణంగా వివరించారు. సహస్ర గేయ రచయిత, సభాద్యక్షుడు శ్రీ మౌనశ్రీ మల్లిక్ గారు మొదటగా కాప్రా వేదిక సాహితీ మూర్తులను ఆహ్వానించి చక్కని కార్యక్రమాలు చేస్తూ అందరినీ ఆకర్షిస్తుందన్నారు. ముందు ముందు ఇలాంటి కార్యక్రమాలను పెక్కు చేయాలని ఆకాంక్ష్యను వ్యక్తపరిచారు. విశిష్ట అతిధి, విశ్రాంత అటవీ శాఖ అధికారి శ్రీ అంబటి లింగ క్రిష్ణారెడ్డి గారు కవులు పదికాలాల పాటు ప్రజల నాలుకలలో నిలిచిపోయే కవితలను వ...